කොළඹදීය (ඒ.එෆ්.පී/රොයිටර්)
 
මාලදිවයිනේ ජනාධිපතිවරණයෙන් විපක්ෂ නායක ඊබ්‍රහිම් මොහොමෙද් සෝලි අද (24) ජය ලැබීය. 
 
එරට මැතිවරණ කොමිසම අද නිකුත් කළ ප්‍රතිඵලවලට අනුව සෝලි සියයට 58.3ක ඡන්ද ප්‍රතිශතයක් හිමි කරගෙන තිබිණි. 
 
මාලදිවයිනේ විදේශ අමාත්‍යාංශය ද ට්විටර් පණිවුඩයක් නිකුත් කරමින් ඊබ්‍රහිම් මොහොමෙද් සෝලි ජයගත් බව සඳහන් කර තිබිණි. කෙසේ නමුත් ජනාධිපතිවරණයේ නිල ප්‍රතිඵල නිකුත් කිරීමට නියමිතව ඇත්තේ සැප්තැම්බර් 30 වැනිදා යැයි පැවසේ. 
 
ඊයේ (23) පැවැති ජනාධිපතිවරනයෙන් බලයේ සිටි අබ්දුල්ලා යමීන් ජයගනු ඇතැයි පශ්චාත් මැතිවරණ ක්‍රියාවලිය නිදහස් හා සාධාරණ නොවනු ඇතැයි ජාත්‍යන්තර මැතිවරණ නිරීක්ෂණ සංවිධාන ඇතුළු බොහෝ පිරිස් පෙන්වා දුන්හ. ජනාධිපතිවරණයට පෙර සිටම අබ්දුල්ලා යමීන් විපක්ෂ ක්‍රියාකාරීන් අත්අඩංගුවට ගනිමින් දැඩි පාලනයක් ගෙන ගිය අතර පූර්ව මැතිවරණ ක්‍රියාවලිය නිදහස් හා සාධාරණ නැතැයි සඳහන් කරමින් එක්සත් ජාතීන්ගේ සහ යුරෝපා සංගම් මැතිවරණ නිරීක්ෂකයෝ මැතිවරණ නිරීක්ෂණ ක්‍රියාවලියට එක් නොවූහ. 
 
සෝලි ජයගත් බව ප්‍රකාශයට පත්වීමත් සමඟ මාලිදිවයින් ප්‍රජාතන්ත්‍රවාදී පක්ෂයේ (එම්.ඩී.පී) පක්ෂ ආධාරකරුවෝ කහ පැහැ ධජ ඇතිව වීදිවල ජය සැමරූහ. 
 
මැතිවරණ ප්‍රතිඵල ජනාධිපති අබ්දුල්ලා යමීන් අද (24) සවස් වනතුරුත් කිසිදු ප්‍රකාශයක් කර නොතිබිණි.  
 
අබ්දුල්ලා යමීන් දැඩි පාලනයක් ගෙන යන බවට විපක්ෂ කණ්ඩායම්වලින් සහ ජාත්‍යන්තරයෙන් දැඩි විරෝධයක් එල්ල වී තිබිණි. මාලදිවයින ඉන්දු චීන බල අරගලයේ පොර පිටියක් බවට පත්ව තිබීම ඊට ජාත්‍යන්තරයේ අවධානය වැඩි වශයෙන් යොමු වීමට හේතු විය. 
 
බලයේ සිටින ජනාධිපතිවරයා වන අබ්දුල්ලා යමීන්ට චීනයේ සහාය හිමිවන බව බොහෝ පාර්ශව ප්‍රකාශ කරන්නට වූ අතර මාලදිවයිනේ ක්‍රියාත්මක බොහෝ යටිතල පහසුකම් සංවර්ධනය කිරීමේ ව්‍යාපෘතිවලට මූල්‍ය දායකත්වය දක්වන්නේ ද චීනයයි. 
අබ්දුල්ලා යමීන්ගේ පාලනය යටතේ බොහෝ මාධ්‍යය ද වාරණයට ලක්ව තිබිණි. මෙම තත්ත්වය මධ්‍යයේ විපක්ෂ අපේක්ෂකයකුට ජනාධිපතිවරණයෙන් ජය ලැබීමට හැකියාවක් නැතැයි බොහෝ පිරිස් කීහ.

මේ තත්ත්වය යටතේ මාලදිවයිනේ විපක්ෂ කණ්ඩායම් යමීන් පරාජයට පත් කිරීම සඳහා විපක්ෂ සන්ධානයක් ගොඩනැගීය. එම ඒකාබද්ධ විපක්ෂයේ ජනාධිපති අපේක්ෂකයා වූයේ ඊබ්‍රහිම් මොහොමෙද් සෝලිය. 
 

   ජනාධිපතිවරණ සටන පැවැත්වුණේ බලයේ සිටින ජනාධිපතිවරයා වන අබ්දුල්ලා යමීන් සහ ඊබ්‍රහිම් මොහොමෙද් සෝලි අතරය. 
අනෙකුත් ප්‍රධාන විපක්ෂ ක්‍රියාකාරීන් සියලු දෙනාගෙන් බොහෝ දෙනා සිරභාරයට පත්ව ඇති අතර අනෙක් ප්‍රධානීන් රටින් පිටුවහල් කර ඇත. 
ජනාධිපතිවරණ ප්‍රතිඵල නිකු-ත් වීමට ආරම්භ වී පැය කිහිපයකට පසු සෝලි සහ යමීන් අතර පරතරය වැඩි වූ විට සෝලි, යමීන් අමතා පරාජය බාර ගන්නට යැයි ද පවසා ඇත. ප්‍රතිඵල නිකු-ත් වීමෙන් අනතුරුව ප්‍රකාශයක් කරමින් ඔහු ඒ බව ප්‍රකාශ කළේය.
“මම යමීන්ට කතා කළා. ජනතාවගේ කැමැත්තට ගෞරව කරව සාමකාමී සහ සුමට ලෙස බලය පවරන්නැයි මා ඔහුට කියා සිටියා” සෝලි කීය. 
දේශපාලන සිරකරුවන් බවට පත්ව සිටින සියලු දෙනා නිදහස් කරන්නැයි ද සෝලි, ජනාධිපති යමීන්ට අවධාරණය කළේය. 

(055)