(නිමල කොඩිතුවක්කු)      

උග‍්‍ර ණය උගුලකට සිරවී  සිටන නෙවිල් ප‍්‍රනාන්දු  රෝහල රාජ්‍ය බැංකුවකට සින්න වීමට ආසන්න අවස්ථාවේ රජය මැදිහත්වී එම රෝහල බේරාගෙන ඇතැයි දුෂණ විරෝධී හඬ සංවිධානයේ කැදවුම්කරු වසන්ත සමරසිංහ මහතා අද (13) පැවසීය.

මේ හේතුවෙන් සෑම මසකටම රුපියල් මිලියන 25 බැගින් වසර 10ක කාලයක් සදහා රුපියල් මිලියන 3000 ක මුදලක් ගෙවීමට රජයට සිදුව ඇති බවත් එහි පළමු වාරිකය පසුගිය අගෝස්තු මාසයේදී ගෙවා ඇති බවත් ඒ මහතා අවධාරණය කළේය.

මරදාන පිහිටි සමාජීය හා සාමයික කේන්ද්‍රයේ පැවති මාධ්‍ය හමුවකට එක්වෙමින් හෙතෙම මේ බව පැවසීය.

‘‘අපි ළඟ තියෙනවා නෙවිල් ප‍්‍රනාන්දු මහතාට ලංකා බංකුව ණය දීපු ආකාරය පිළිබඳ තොරතුරු. 2011 මැයි මාසයේ මිලියන 130යි.  ජූලි මාසයේ මිලියන 120යි. නොවැම්බර් මාසයේ මිලියන 300යි. 2012 වසරේ ජූලි 25 වනදා මිලියන 1000යි. 2014 අපේ‍්‍රල් 04 වනදා මිලියන 170යි. 2016 ජූලි 28 වනදා මිලියන 225යි. 2016 අගෝස්තු 22වනදා මිලියන 100යි. 2017 මැයි මාසයේ 25 වනදා මිලියන 103යි. 2017 ජුනි මාසේ 06 වනදා තව මිලියන 300යි. ඔක්කොම මිලියන 2466ක් දීලා තියෙනවා.  මේ මිලියන 2466න් මේ වනවිට මිලියන 2265ක් ණයයි. ණය ගෙවා ගන්න බැරි නිසා විවිධ අවස්ථාවල බැංකු අයිරාවක් අරගෙන ණය ගෙව්වා. බැංකු අයිරා පහසුකම් දුන්නා මිලියන 660ක්. නෙවිල් ප‍්‍රනාන්දුගේ සමස්ත වත්කම් වලට වැඩිය ණය දීලා තියෙනවා.          මේ බැංකු නිලධාරීන්ට ආණ්ඩුවේ ඇමැතිවරන් සිදු කළ බලපෑම් මත තමයි මේ ණය දෙන්න සිදු වෙලා තියෙන්නේ. දැන් නෙවිල් ප‍්‍රනාන්දුට මේ ණය ගෙවන්න රෝහලට ආදායම් නැහැ. මේ ජාවාරම තමයි අද හවුල් ආණ්ඩුව සුජාත භාවයට පත් කරලා තියෙන්නේ. ‘‘යැයි ද ඔහු කියා සිටියේය.