(නිමල කොඩිතුවක්කු)

 

අමාත්‍යධුර වලින් ඉල්ලා අස්වූ එක්සත් ජාතික පක්ෂය නියෝජනය කරන මුස්ලිම් මන්ත‍්‍රීවරුන් පක්ෂ නායකත්වයෙන් ඉල්ලීමක් ඉදිරිපත් වුවහොත් යළි අමාත්‍යධූර බාර ගන්නා බව තැපැල් සේවා  මුස්ලිම් ආගමික කටයුතු හිටපු අමාත්‍ය අබ්දුල් හලීම් මහතා පැවැසීය.

එක්සත් ජාතික පක්ෂය නියෝජනය කරන මන්ත‍්‍රීවරුන් යළි අමාත්‍යධුර බාර ගැනීම සම්බන්ධයෙන් වෙනත් පක්ෂ නියෝජනය කරන මුස්ලිම් මන්ත‍්‍රීවරුන්ගේ  එකඟතාවය හිමි වී ඇති  බවත් ඔහු සඳහන් කළේය.

ආණ්ඩුව නියෝජනය කරන සියලූම මුස්ලිම් මන්ත‍්‍රීවරුන්ගේ සහභාගීත්වයෙන් පාර්ලිමේන්තුවේ පැවති සාකච්ඡාවකදී මෙම තීරණය ගත් බවද හලීම් මහතා පැවැසීය.

මෙම සාකච්ඡාව සඳහා එක්සත් ජාතික පක්ෂයේ සභාපති කබීර් හෂීම්, ශ්‍රී ලංකා මුස්ලිම් කොංග‍්‍රසයේ නායක රවුෆ් හකීම්, සමස්ත ලංකා මුස්ලිම් කොංග‍්‍රසයේ නායක රිෂාද් බදියුදීන් ඇතුළු පිරිසක් එක්ව සිටි බවද ඔහු සඳහන් කළේය.

පාස්කු ඉරිදා ප‍්‍රහාරය සම්බන්ධයෙන් දැනට කෙරෙන පරීක්ෂණ සඳහා සහාය පළකරන බව පවසමින් ආණ්ඩුව නියෝජනය කරන මුස්ලිම් කැබිනට්, රාජ්‍ය සහ නියෝජ්‍ය අමාත්‍යවරුන් නව දෙනෙකු  පසුගිය තුන්වනදා  සිය ධුර වලින් ඉල්ලා අස්වනු ලැබීය.