(අජිත්ලාල් ශාන්තඋදය සහ ප‍්‍රියනාත් චන්‍ද්‍රපාල )

කුමන නැගෙනහිර ජාතික උද්‍යානයේ මාර්ග ප‍්‍රතිසංස්කරණ කටයුතුවල නිරතව සිටි ට‍්‍රැක්ටර් රියදුරෙක් උද්‍යානයේ කොටියෙකුගේ පහරකෑමට ලක්වීමේ සිද්ධියෙන් පසු සංචාරකයන් සඳහා උද්‍යානයේ වසා ඇතැයි පැතිරයන තොරතුරු අසත්‍ය බව උද්‍යානයේ වැඩබලන භාරකාර චන්දන වික‍්‍රමසිංහ මහතා අද ( 19)  පැවසීය.
 
එම කොටියාගේ ම ප‍්‍රහාරයකට ලක්වූ වනජීවී නිලධාරීන්ගේ උදව්වට පැමිණි සංචාරකයන් ගෙන යන සෆාරි ජීප් රියදුරාට අද දහවල් විශේෂ සැත්කමක් කළ බව අම්පාර රෝහලේ ප‍්‍රකාශකයෙක් පැවසුවේය.
 
 පානම ග‍්‍රාමීය රෝහලට 18දා සනධ්‍යාවේ ඇතුළු  කළ ඔහු වහාම අම්පාර මහ රෝහලට මාරුකර යැවිනි. බරපතල තුවාල ලබා සිටි ඔහු අම්පාර මහ රෝහලේ දැඩිසත්කාර ඒකකයට ඇතුළත් කරනු ලැබිණි.
 
මියගොස් ඇත්තේ පොතුවිල් තිරුක්කෝවිල ප‍්‍රදේශයේ පදිංචිකරුවෙක් වූ සෙල්ලදොරේ රවිචන්‍ද්‍රන් නැමැත් හතළිස් පස් හැවිරිදි විවාහකයෙකි.

මියගිය තැනැත්තා පෞද්ගලික කොන්ත‍්‍රාත්කරුවකු යටතේ සේවය කරන ට‍්‍රැක්ටර් රියදුරෙකි. තුවාල ලබා රෝහල්ගත කර ඇත්තේ මොනරාගලදඹගල්ල ප‍්‍රදේශයේ පදිංචි අබේසිංහ හේරත් මුදියන්සේලාගේ චමීර අබේසිංහ නැමැති විසි හය හැවිරිදි අවිවාහකයෙකි. ඔහු කුමන ජාතික  උද්‍යානයේ  සෆාරි ජීප් රථයක් පදවන පෞද්ගලික රියදුරෙකි.
 
සිද්ධිය වී ඇත්තේ කුමන ජාතික උද්‍යානයේ බාගුරා කලපු ප‍්‍රදේශයේ බඹරගස්තලාව මාර්ගයේ කිරිපොකුණ ප‍්‍රදේශයේ දීය. කුමන ජාතික උද්‍යානයේ වෙසෙන මෙම කොටියන් හඳුන්වන්නේ පැන්තරාපාඩස් කොටියා නමිනි.
 
මෙම සිදුවීම කුමන ජාතික උද්‍යානයේ සංචාරකයන්ට කිසිසේත් බල නොපාන බව වනජීවී නිලධාරීහූ අවධානය කරති. තුවාල ලැබූ සෆාරි ජීප් රියදුරා ද සංචාරකයන් පිරිසක් ගෙනගිය අයකු නොව වනජීවී නිලධාරීන්ගේ උදව්වට ගිය පුද්ගලයෙක් බව ද වනජීවී නිලධාරීහූ කියති. ඒ නිසා කුමන ජාතික උද්‍යානයේ සංචාරය කරන්නන්ට මෙම සිද්ධිය බලනොපාන බවද ඔවුහු කියති.

 සිද්ධිය වු ස්ථානයේ  සිතියම