(දයාරත්න ඇඹෝගම)

උතුරු මැද පළාත් සභාව විසුරුවා හැරිමෙන් පසුව පළාත් අධ්‍යාපන අමාත්‍යාංශය නිති විරෝධි ආකාරයට පෙරේදා සුළු සේවක පත්විම් 100කට අධික ප‍්‍රමාණයක් ලබා දී ඇතැයි ලංකා ගුරු සංගමයේ සභාපති ප‍්‍රියන්ත ප‍්‍රනාන්දු මහතා පවසයි.

උතුරු මැද පළාතේ පාසල් සදහා මුරකරු සහ කාර්යාල කාර්ය සහායකයන් ලෙස මෙම පත්වීම් දි ඇති බව ප‍්‍රියන්ත ප‍්‍රනාන්දු මහතා කියයි.

මේ සම්බන්ධයෙන් අදහස් දක්වමින් ප‍්‍රියන්ත ප‍්‍රනාන්දු මහතා මෙසේද පැවසිය.

“මෙම පත්විම් ලබාදිමේදි පිළිගත් නිතිමය සම්ප‍්‍රදායන් කඩ කර තිබෙනවා. කිසිම ප‍්‍රසිද්ධ කිරිමක් කළේ නැහැ.අයදුම්පත් කැදවූවේත් නැහැ.මෙම පත්විම් ලබාදි ඇත්තේ උතුරු මැද පළාත් සභාවේ හිටපු පක්ෂ විපක්ෂ මන්ත‍්‍රිවරුන්ගේ සහ අමාත්‍යංශවල උසස් නිලධාරින්ගේ නැදැයන්ට.

මේවන විට උතුරු මැද පළාත් සභාවේ පාසල්වල කාර්යාල සහායකයන් 143 ක් අතිරික්තයි.එසේ තිබියදි කඩිමුඩියේ හොර රහසේ තවත් පාසල් රැසකට කාර්යාල සහායකයන් නිති විරෝධි ආකාරයට බඳවා ගෙන තිබෙනවා.මෙම සියලූ සේවකයන් හෙට (13)  දින සිට මේ පාසල්වලට සේවයට වාර්තා කරනවා.

මිට පෙරත් උතුරු මැද හිටපු ප‍්‍රධාන අමාත්‍ය පේෂල ජයරත්න මහතා නිති විරෝධි ආකාරයට පාසල් සදහා සුළු සේවකයන් 69 දෙනකු බඳවාගෙන තිබෙනවා.ඊට විරුද්ධව හිටපු පළාත් සභා මන්ත‍්‍රි නිතිඥ කස්තුරු අනුරාධනයක මහතා විසින් බරපතල වංචා සහ දුෂණ කොමිසමටත් පැමිණිල්ලක් සිදු කර තිබෙනවා.එසේ තිබියදි තමයි මේ පත්විම් පෙරේදා(11) තමයි ලබාදි තිබෙන්නේ.මේක නිති විරෝධියි.එම නිසා මිට එරෙහිව ලංකා ගුරු සංගමය නිතිමය ක‍්‍රියා මාර්ගයක් ගැනිමට ඉදිරියේදි කටයුතු කරනවා“යැයි ඒ මහතා ප්‍රකාශ කරයි.

මේ සම්බන්ධයෙන් කරුණු දැන ගැනිම සදහා උතුරු මැද ප‍්‍රධාන ලේකම්වරයාට, අධ්‍යාපන අමාත්‍යාංශයේ ලේකම්වරියට සහ පළාත් අධ්‍යාපන අධ්‍යක්ෂවරියට දුරකථනයෙන් ඇමතුවද ඔවුන්ගෙන් ඊට ප‍්‍රතිචාරයක් නොලැබුණි.