(  නාලක සංජීව දහනායක)


මිළ සූත‍්‍රය අනුව මසකට වරක් ඉන්ධන මිළ ඉහළ දමන්නේනම් එයට සරිලන ලෙස සියළුම සේවක සේවිකාවන්ගේ වැටුප් ඉහළ දැමීම සඳහාද වැටුප් සූත‍්‍රයක් හඳුන්වා දිය යුතු බව ඒකාබද්ධ විපක්‍ෂයේ ප‍්‍රධාන සංවිධායක පාර්ලිමේන්තු මන්ත‍්‍රී ඩලස් අලහප්පෙරුම මහතා අද (12) පැවසීය.


ඉන්ධන මිළ ඉහළ දැමීමට සමානව වැටුප් වැඩි නොවීම නිස ජනතාවගේ ආර්ථිකය ඉතාම වේගයෙන් අගාධය කරා ගමන්කරමින් තිබෙන බවද ඔහු කීය.

 මන්ත‍්‍රීවරයා මෙසේද කීය.

ඉන්ධන මිළ සූත‍්‍රයට අනුව සති තුනක කාලයක් ඇතුළතදී තුන්වැනි වරටත් ඉන්ධන මිළ ඉහළ ගිහිල්ලා. ඛණිජතෙල් මිළ ඉහළ යෑමත් සමඟම අනෙක් සියළුම භාණ්ඩ හා සේවාවල මිළ වැඩිවෙනවා. මේ ඉන්ධන මිළ සූත‍්‍රය කුමක්ද, මිළ වැඩිවෙන්නේ කුමන ප‍්‍රතිශතයකින්ද කියන්න ජනාධිපතිවරයා දන්නේ නැහැ. 


මේ ඉන්ධන මිළ සුත‍්‍රය සම්බන්ධයෙන් තමන් කිසිවක් නොදන්නා බව විෂයභාර අමාත්‍යවරයා හා ඛණිජතෙල් සංස්ථාවේ වෘත්තීය සමිති සඳහන් කරනවා. මුදල් ඇමතිවරයා හැර ආණ්ඩුවේ කිසිම ඇමතිවරයෙක් මේ මිළ සූත‍්‍රය ගැන දන්නේ නැහැ. තොරතුරු දැනගැනීමේ පනත යටතේවත් මේ සූත‍්‍රය ගැන කිසිම තොරතුරක් දෙන්නේ නැහැ. මෙය මායාකාර ගුප්ත මිළ සුත‍්‍රය මොකද්ද?. 


මේ මිළසූත‍්‍රය අනුව රටේ ආර්ථිකය කොතැනටද ගමන් කරන්නේ කියන ප‍්‍රශ්නය අපිට ඇතිවෙනවා. 2008 වසරේදි බොරතෙල් බැරලයක මිළ ඇමරිකානු ඩොලර් 140 දක්වා ඉහළ ගියා. වත්මන් ආණ්ඩුව යටතේ එවැනි තත්ත්වයක් නිර්මාණය වුනොත් අපේ රටේ පෙට්ට‍්‍රල් ලීටරයක් රුපියල් 295 ක මුදලකට විකුණන්න වෙනවා. ඒ නිසා මේ මිළසූත‍්‍රය කොයිතරම් විනාශකාරීද කියලා පේනවා. මසකට වරක් ඉන්ධන මිළ ඉහළ දමනවානම් එයට සරිලන ලෙසට සියළුම සේවක සේවිකාවන්ගේ වැටුප් ඉහළ දැමීමේ සූත‍්‍රයක් නිර්මාණය කළ යුතුයි. එහෙම නොවුනොත් ජනතාවගේ ආර්ථිකය ඉතාම වේගයෙන් අගාධය කරා ගමන් කරන බවක් පෙනෙන්න තිබෙනවා යැයිද කීය.


ඒකාබද්ධ විපක්‍ෂය බොරැල්ල, ආචාර්ය එන්.එම් පෙරේරා කේන්ද්‍රයේ මාධ්‍ය හමුවකට එක්වෙමින් ඒ මහතා මේ බව සඳහන් කළේය.