(නිමන්ති රණසිංහ)

මින් වසර දෙකකට පෙර විශ්ව විද්‍යාල ප‍්‍රතිපාදන කොමිෂන් සභාව ඉදිරිපිටදී විරෝධතාවක් කර මහජන පීඩා සිදුකළැයි කියන සිද්ධියකට අදාළව අන්තර් විශ්ව විද්‍යාල ශිෂ්‍ය බල මණ්ඩලයේ කැදවුම්කරු ළහිරු චතුරංග වීරසේකර සහ ශිෂ්‍ය භික්ෂූන් වහන්සේ නමක ඇතුළු  හය දෙනකු අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප‍්‍රධාන මහේස්ත‍්‍රාත් ලාල් රණසිංහ බණ්ඩාර මහතා අද (19) වරෙන්තු නිකුත් කළේය.

මෙම සිද්ධියට අදාළ නඩුව අද (19) අධිකරණය හමුවේ යළි කැදවූ අවස්ථාවේදී මෙහි සැකකරුවන් වූ ළහිරු චතුරංග වීරසේකර, පූජ්‍ය තැන්නේ ඥාණානන්ද හිමි, ආර්. පී. අමිල සඳරුවන්, තුවාන් රංගන සමරතුංග, ආත්මා ප්‍රියදර්ශන සහ දිනේෂ් මධුරංග යන අය අධිකරණය හමුවේ පෙනී නොසිටීම හේතුවෙන් වරෙන්තු නිකුත් කෙරිණ. 

2015 ඔක්තෝම්බර් මස 06 වැනි දා අන්තර් විශ්ව විද්‍යාල ශිෂ්‍ය බලමණ්ඩලයේ සාමාජිකයින් විසින් විශ්ව විද්‍යාල ප‍්‍රතිපාදන කොමිසන් සභාව ඉදිරිපිටදී කරන ලද විරෝධතාවකදී මහජන පීඩා සිදුවී ඇතැයි සදහන් කරමින් මෙම සැකකරුවන්ට එරෙහිව කුරුදුවත්ත පොලීසිය විසින් චෝදනා ගොනු කර තිබිණි. 
සිද්ධියට අදාළ නඩුව ලබන අගෝස්තු 25 වැනි දා යළි කැඳවීමට නියමිතය.