(මනෝප‍්‍රිය ගුණසේකර)

 

හෙරොයින් ග්‍රෑම් 3.85 ක් ළඟ තබාගැනීමේ චෝදනාවට වරදකරු වු ග‍්‍රැන්ඩ්පාස් ප‍්‍රදේශයේ 60 හැවිරිදි කාන්තාවකට කොළඹ මහාධිකරණ විනිසුරු ලලිත් ඒකනායක මහතා ජීවිතාන්තය දක්වා වු බරපතල වැඩ සහිත සිරදඬුවමක් අද (14) නියම කළේය.

හෙරොයින් ළඟ තබාගැනීමේ චෝදනාවන්ට මීට පෙර වරදකරු වී ඇති බවට අධිකරණයට වාර්තා වී ඇති මෙම විත්තිකාරියට එරෙහි මෙම නඩුවේ චෝදනා පැමිණිල්ල විසින් සාධාරණ සැකයකින් තොරව ඔප්පු කර ඇතැයි තීරණය කළ විනිසුරුවරයා විත්තිකරුට ජීවිතාන්තය දක්වා වු බරපතල වැඩ සහිත සිරදඬුවමක් නියම කළේය.

කොළඹ 14 ග‍්‍රැන්ඩ්පාස් ස්ටේට්පුර ප‍්‍රදේශයේ පදිංචි ජෝර්ජ් ඥාණප‍්‍රගාසම් අයිරාංගනී හෙවත් බට්ටි නමැති 60 හැවරිදි වියේ පසුවු කාන්තාවකට මීට වසර 3 කට පෙර සිදුකළ වරදක් සම්බන්ධයෙන් මෙලෙස ජීවීතාන්තය දක්වා වු බරපතල වැඩ සහිත සිරදඬුවම් නියම කරන ලදී.

2015 නොවැම්බර් 24 වැනි දා හෝ ඊට ආසන්න දිනයක ග‍්‍රැන්ඩ්පාස් ප‍්‍රදේශයේ දී හෙරොයින් ග්‍රෑම් 3.85 ක් ළඟ තබා ගැනීම සහ ජාවාරම් කිරීම යටතේ විත්තිකාරියට එරෙහිව නීතීපතිවරයා විසින් නඩු පවරා තිබිණි.

මේ සම්බන්ධයෙන් පැවැති දීර්ඝ නඩු විභාගය අවසානයේ දී විත්තිකාරියට එරෙහිව නඟා ඇති චෝදනාවන්ගෙන් හෙරොයින් ළඟ තබාගැනීමේ චෝදනාව පැමිණිල්ල විසින් සාධාරණ සැකයකින් තොරව ඔප්පු කර ඇති හෙයින් එම චෝදනාවට ඇය වරදකාරිය බව තීරණය කළ විනිසුරුවරයා හෙරොයින් ජාවාරම් කිරීමේ චෝදනාව පැමිණිල්ල විසින් සාධාරණ සැකයකින් තොරව ඔප්පු කර නොමැති හෙයින් එම චෝදනාවෙන් ඇය නිවැරදිකාරිය බව තීරණය කළේය.