(අජන්ත කුමාර අගලකඩ)

හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය ශ්‍රී ලංකා නිදහස් පක්ෂයේ අනුශාසක ධූරයෙන්ද ඉවත් කෙරෙනු ඇතැයි එම පක්ෂ ආරංචි මාර්ග සඳහන් කරයි.

කුමාරතුංග මහත්මියගේ පක්ෂ සාමාජිකත්වයද අත්හිටුවීමට තීරණය කර ඇති අතර ඒ පිළිබඳ යෝජනාව හෙට (05) පැවැත්වෙන පක්ෂයේ මධ්‍යම කාරක සභාවේදී අනුමත කර ගැනීමට නියමිතය.

ශ්‍රී ලංකා නිදහස් පක්ෂය ජනාධිපතිවරණයේදී පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂ මහතාට සහය දීමට තීරණය කර තිබියදී පක්ෂයේ මධ්‍යම කාරක සභා තීරණයට පිටින් යමින් චන්ද්‍රිකා කුමාරතුංග මහත්මිය එජාප ජනපති අපේක්ෂක සජිත් ප්‍රේමදාස මහතාට සහය දීමට ගිවිසුම් ගතවීම නිසා ඇය අනුශාසක ධූරයෙන් ඉවත් කිරීමටත් ඇයගේ පක්ෂ සමාජිකත්වය අත්හිටුවීමටත් මෙසේ තීරණය කර ඇතැයි එම ආරංචි මාර්ග සඳහන් කරයි.

ශ්‍රී ලංකා නිදහස් පක්ෂයේ මධ්‍යම කාරක සභාව එහි වැඩබලන සභාපති රෝහණ ලක්ෂ්මන් පියදාස මහතාගේ ප්‍රදානත්වයෙන් පක්ෂ මූලස්ථානයේදී හෙට (05) පැවැත්වේ.