(රංජන් කස්තුරි)

පාර්ලිමේන්තුවේ ඉකුත් නොවැම්බර් මාසයේ සිදුවූ නොසන්සුන්කාරී තත්ත්වය සම්බන්ධයෙන් ත්‍රිකුණාමලය දිස්ත්‍රික් එක්සත් ජනතා නිදහස් සන්ධාන පාර්ලිමේන්තු මන්ත්‍රී සුසන්ත පුංචි නිලමේ මහතා කර ඇති පැමිණිල්ලකට අනුව පොලිස් විශේෂ විමර්ශණ ඒකකය ඒ මහතාගෙන් අද (15) පැය දෙකක පමණ කාලයක් ප්‍රකාශයක් සටහන් කර ගෙන තිබේ.

පාර්ලිමේන්තුවේ ඉකුත් නොවැම්බර් මස 14,15 සහ 16 යන දිනයන් වලදී පැවැති නොසන්සුන්කාරී තත්ත්වයට වගකිවයුත්තේ කතානායක කරු ජයසූරිය මහතා බවත් ඒ සම්බන්ධයේන් නිසි පරීක්ෂණයක් කර පියවර ගන්නා ලෙසත් සුසන්ත පුංචි නිලමේ මන්ත්‍රීවරයා ඉකුත් දෙසැම්බර් මස 11 වැනිදින පොලිස් දෙපාර්තමේන්තුවට ලිඛිත පැමිණිල්ලක් ඉදිරිපත් කර තිබිණි.

එම පැමිණිල්ල සම්බන්ධයෙන් සිදුකරන පරීක්ෂණ සඳහා පැමිණිලිකාර මන්ත්‍රීවරයාගෙන් ප්‍රකාශයක් සටහන් කර ගැනීම සඳහා ඔහු අද පෙරවරු 10.30ට පොලිස් විශේෂ විමර්ශන ඒකකයට කැඳවා තිබිණි.

පාර්ලිමේන්තු සභා ගර්භය තුළදී මන්ත්‍රීවරයෙකු ජීවිතක්ෂයට පත්වීමක් හෝ එවැනි සිදුවීමක් අපේක්ෂාවෙන් වුව ඒ ඔස්සේ රටේ මහජන කැළඹීමක් කර රට අස්ථාවර කිරීම තුළින් සහ ජනාධිපතිවරයා ගත් තීන්දුව නීත්‍යානූකූල නොවන බවට ලෝකය හමුවේ ඒත්තු ගන්වමින් ජනාධිපතිවරයා තනතුරින් පහකර රාජ්‍ය බලය තමන් අභිමත පුද්ගලයෙකුට ලබාදීමට කතානායක කරු ජයසූරිය මහතා කටයුතු කරන්නේ යැයි මන්ත්‍රීවරයා කර ඇති පැමිණිල්ලේ සඳහන්වේ.