(ශ්‍රීනාත් ප්‍රසන්න ජයසූරිය)

ගිරිබාව පොලිස් වසමේ සාලිය අශෝකපුර යාය දෙක ප්‍රදේශයේ පදිංචිව සිටි 17 හැවිරිදි මධුෂාණි නමැති පාසල් සිසුවිය ඝාතනය කිරීම සම්බන්ධයෙන් සැකපිට අත්අඩංගුවට ගනු ලැබූ තම පුතා එල්ලා මැරුවාට විරුද්ධත්වයක් නොමැති බව අධිකරණයට ප්‍රකාශ කරන බව කියා ලියුමක් ලියූ එම සැකකරුගේ මව වන ආර්.කේ. කුසුමාවතී මහත්මිය හිරියාල, පළුගොල්ල කුණ්ඩගල ආරණ්‍ය සේනාසනයේදී රාජාංගණයේ ධම්මදින්නා ලෙස ඊයේ (11) මෙහෙණි සසුනට පිවිසුණාය. 

“මෙහෙණි සසුනට එක්වූ මට අවස්ථාවක් ලබාදුන්නොත් මධුෂාණි දියණියගේ නිවසට වැඩම කර එම  දියණියට පින් අනුමෝදන් කිරීමේ ධර්ම දේශනාවක් කරන්න මගේ ලොකු බලාපොරොත්තුවක් තිබෙනවා. අනන්ත  අප්‍රමාණ වූ දුක් කම්කටොළුවලින් පිරි මේ සංසාරෙන් එතෙර වීමට අධිෂ්ඨාන කරගෙන ජීවිතයේ ඉතිරි කාලය භාවනායෝගීව වැඩ වාසය කරනවා.

ගිහි ජීවිතය අතහැර දැමීමට හේතුවුණේත් මගේම දියණියක නොවුණත් මධුෂාණි දියණියගේ දුක්ඛිත මරණයයි. එයින් මට ජීවිතය ගැන විශාල කලකිරීමක් ඇතිවුණා” යැයි රාජාංගණයේ ධම්මදින්නා මෙහෙණිය ලංකාදීපයට පැවැසුවාය. කඩවත ධම්මවීර හිමියන් තමාගේ ගුරු හිමියන් බවද ඇය කීවාය.