(ආනන්ද ඉ. ජයකොඩි)

විගඩ සණස බැංකුවේ තැන්පත්කොට තිබූ රුපියල් ලක්‍ෂ 3687ක මුදලක් අස්ථාන ගත වී ඇතැයි කියන සිද්ධියක් සම්බන්ධව රහස් පොලිසිය කරන ලද ඉල්ලීමක් සලකා බැලූ අත්තනගල්ල මහේස්ත‍්‍රාත් තරංගා රාජපක්‍ෂ මහත්මිය අද (21) එම සමිතියේ සභාපති ඇතුළු අධ්‍යක්‍ෂක මණ්ඩලයේ සාමාජික සමාජිකාවන් අට දෙනෙකුට විදේශගත වීම තහනම් කිරීමට නියෝග කළාය.

සභාපති  සමීර සේනානායක, ශ්‍යාමිකා දිසානායක, ජගත් කුමාර, ධම්මිකා නන්දනී, ශානිකා කුමාරි, කේ. ජයසූරිය, ඩබ්ලිව්.ඒ. ශ‍්‍රියානි හා රම්‍යා නන්දනී යන අධ්‍යක්‍ෂක මණ්ඩලයේ අට දෙනොට එසේ වහාම ක‍්‍රියාත්මක වන පරිදි විදේශ ගත වීම තහනම් කෙරිණි.

නියෝගය වහාම ආගමන විගමන පාලකවරයා වෙත යැවීමටද නියම කෙරිණි.

විගඩ සණස සමිතියට අයත් සණස බැංකුවේ තැන්පත්කරුවන් විසින් තැන්පත් කොට ඇති රුපියල් ලක්‍ෂ තුන්දහස් හයසිය අසූහතක මුදලක් අස්ථාන ගත වී ඇති බවට ගම්පහ සමූපකාර කොමසාරිස් රුවනි විජේවික‍්‍රම මහත්මිය විසින් කර ඇති පැමිණිල්ලකට අනුව රහස් පොලිසිය පරීක්‍ෂණ  පවත්වා ගෙන යයි.

එම පැමිණිල්ලට අනුව රහස් පොලිසිය අධිකරණයෙන් කරන ලද ඉල්ලීමක් සළකා බැලූ මහේස්ත‍්‍රාත්වරිය එසේ අධ්‍යක්‍ෂක මණ්ඩලයේ සාමාජික සාමාජිකාවන් අට දෙනොට රටින් පිටවීම තහනම් කළාය.

නැවත කැඳවීමේ දිනයක් ලබානොදුන් අතර වැඩිදුර පරීක්‍ෂණ පවත්වා ප‍්‍රගතිය වාර්තා කරන ලෙසට මහේස්ත‍්‍රාත්වරිය රහස් පොලිසියට නියෝග කළාය.