(හිරාන් ප්‍රියංකර ජයසිංහ)

වනාතවිල්ලුව මංගලපුර කරඩිපුවල් ප්‍රදේශයේ පොල් වත්තක සඟවා තිබූ පුපුරන ද්‍රව්‍ය සැකසීමට යොදා ගන්නා ද්‍රව්‍ය තොගයක් සහ තවත් උපකරණ රැසක් සමඟ සැකකරුවන් සිව් දෙනෙකු අපරාධ පරික්ෂණ දෙපාර්තමේන්තුව අත්අඩංගුවට ගෙන තිබේ.

අපරාධ  පරික්ෂණ  දෙපාර්තුමේන්තුව අත්අඩංගුවට ගෙන ඇති දෑ අතර ඩෙටනේටර් 100 ක් , වයර් කෝඩ් තොගයක් , ශ්‍රී ලංකාව තුළ තහනම් නයිට්ට්‍රේට් ඇසිඩ් ලිටර් 20 බැගින් වු කැන් හයක් , බල්බ තොගයක්, අධිබල පිපිරවිම් සඳහා යොදා ගන්නා සිෆෝ (වෙඩි බෙහෙත් )කිලේ 75 කට ආසන්න ප්‍රමාණයක්,බොර 12 ගිනිඅවියක් සහ පතෝරම් තොගයක් , වායු රයිෆල් එකක් ,ආරක්ෂිත කුඩාරම් දෙකක් සමඟ දින 20 කට ආසන්න කාලයකට සරිලන වියලි ආහාර තොගයක්,පරිඝනක,කැමරා,ආගමික පොත් පත් තොගයක්, පැදුරු ඇතුළු තවත් දෑ සෝදිසි කිරීම් වලදී  සොයා ගෙන තිබුණි.

දිවයිනේ ප්‍රදේශ ගණනාවක බුද්ධ ප්‍රතිමා විනාශ කිරීමේ සිද්ධියකට සම්බන්ධ සැකකරුවන් පිරිසක් සොයා අපරාධ පරික්ෂණ දෙපාර්තුමේන්තුව සිදුකරමින් තිබූ පරීක්ෂණයට අවශ්‍ය සැකකරුවකු සොයා වනාතවිල්ලුව මංගල පුර කරඩිපුවල් අක්කර 80 කට ආසන්න පොල් ඉඩමට පැමිණි අවස්ථාවේ මෙම පුපුරණ ද්‍රව්‍ය තොගය වලදමා තිබියදී සොයා ගෙන තිබේ.

අපරාධ පරීක්ෂණ දෙපාර්තමේන්තුව සොයා පැමිණ සැකකරු මෙම ස්ථානයේ නොසිටි බවත් එම ස්ථානයේ 24 හැවිරිදි පුත්තලම නගරයේ පදිංචි තරුණයින් සිව් දෙනෙකු රැඳී සිටි බව කියයි.

පරික්ෂණ නිලධාරීන් ආපසු පිටත් වීමට සැරසි සිටියදී එක් ස්ථානයක් පිළිබඳව සැක සිති පරීක්ෂා කිරීමේදී එම ස්ථානයේ වල දමා තිබූ සිෆෝ නැමති අධි බලැති පුපුරණ ද්‍රව්‍ය කැන් වල අසුරා වල දමා තිබියදී සොයා ගැනීමට නිලධාරීන් සමත්ව තිබේ.

පරීක්ෂණ අවසන් වන තුරු පොලිස් විශේෂ කාර්ය බළකාය ඉඩම වටා ආරක්ෂාව යොදවා තිබූ අතර සිද්ධියේ පරීක්ෂණ සඳහා පොලිස් අපරාධ ස්ථාන පරීක්ෂා කිරීමේ නිලධාරීන් , ඇඟිලි සලකුණු අංශය, පුපුරණ ද්‍රව්‍ය සොයා ගැනීමට පොලිස් සුනඛ ඒකකයේ රිනා සහ ලැසි නැමති සුනඛයින්ගේ සහායද ලබා ගෙන තිබේ.

සිද්ධිය සම්බන්ධයෙන් රස පරීක්ෂණ කටයුතු සඳහා රජයේ රස පරීක්ෂකවරයා පැමිණ තිබූ අතර අපරාධ පරීක්ෂණ දෙපාර්තමේන්තුවේ ඉහළ නිලධාරින් විශාල පිරිසක් පැමිණ පරීක්ෂණ වලට එක්ව සිටියහ.

අත්අඩංගුවට ගත් පුද්ගලයින් සිව්දෙනා කුමන කටයුත්තක් සඳහා මෙම පුපුරන ද්‍රව්‍ය තොගය රැගෙන ආවාද යන්න තවමත් හෙළිව නැතත් ඒ සම්බන්ධව මාධ්‍යයට තොරතුර ලබා දීමට අපරාධ පරීක්ෂණ දෙපාර්තමේන්තුව ප්‍රතික්ෂේක කෙරුණි.

අත්අඩංගුවට ගත් පුද්ගලයන් සහ පුපුරණ ද්‍රව්‍ය තොගය ආරක්ෂිතව කොළඹ අපරාධ පරීක්ෂණ දෙපාර්තමේන්තුවට අද (17) රැගෙන යාමට කටයුතු කළේය.