(මහින්ද නිශ්ශංක)

 දුම්රිය රියදුරකු සහ රියදුරු සහායකවරයකු අතර ඇතිවූ මත ගැටුමක් දුරදිග යාමෙන් රියදුරු සහායකවරයා සමග වැඩ කිරීම ප්‍රතික්ෂේප කරමින් මරදාන දුම්රිය විදුලිබල ධාවනාගාරයේ ලොකොමෝටිව් ඔපරේටිං ඉංජිනියර්ස් රියදුරු සංගමයේ රියදුරෝ අද(12) පස්වරුවේ පැය තුනක පමණ කාලයක් වැඩ වර්ජනයේ යෙදුණහ.

ඉකුත් 8වැනිදා රියදුරු පුහුණුවන අයකු සම්බන්ධව රියදුරු හා රියදුරු සහායකයා අතර මත ගැටුමක් හටගෙන ඇති අතර රියදුරු සහායකවරයා සමග රාජකාරී කළ නොහැකි බව දුම්රිය රියදුරන් බලධාරීන්ට දැනුම් දී තිබේ. පසුව බලධාරීන් රියදුරු සහායකවරයා ධාවනාගාරය තුළ සේවයට යොදවා ඇති අතර නැවත ඔහු විවෘත මාර්ගයේ රියදුරන් සමග රාජකාරියේ යෙදවීම වර්ජනයට හේතුවූ බව ලොකොමෝටිව් ඔපරේටිං ඉංජිනියර්ස් සංගමයේ ප්‍රධාන ලේකම් ඉන්දික දොඩම්ගොඩ මහතා පැවසීය.

වර්ජනය සිදුකළ කාලයේ රඹුක්කන හා අලුත්ගම දෙසට ධාවනය වීමට නියමිතව තිබූ දුම්රිය දෙකක් අවලංගු වූ අතර දුම්රිය කිහිපයක් පැයක පමණ කාලයක් ප්‍රමාදවූ බවද වාර්තා වේ.