ඩයනා උදයංගනී
 
රාමලාන් සමයේදී ඉස්ලාම් බැතිමතුන්ගේ පරිභෝජනය සඳහා අවශ්‍ය රට ඉඳි සවුදි අරාබි රජය මගින් ප්‍රදානයක් ලෙස ලබාදීම සාමාන්‍යයෙන් සිදුවුවද මෙවර එසේ නොලැබීම හේතුවෙන්, ආර්ථීක අපහසුතා ඇති මුස්ලිම් පවුල් වෙත බෙදාදීම සඳහා සතොස ආයතනය මඟින් රට ඉඳි මෙට්‍රික් ටොන් 250ක් මිල දී ගැනීමට අමාත්‍ය මණ්ඩල අනුමැතිය හිමිවී තිබේ.

 
මෙම රට ඉඳි මුස්ලිම් දේවස්ථාන හරහා ඉස්ලාම් බැතිමතුන් අතර ඛෙදාදීමට නියමිත බව සම කැබිනට් ප්‍රකාශක, ඉඩම් හා ජනමාධ්‍ය අමාත්‍ය ගයන්ත කරුණාතිලක මහතා පැවසීය.
 
මීට අමතරව ඒ සඳහා පෞද්ගලික පරිත්‍යාගකරුවන් තිදෙනෙකු විසින් රට ඉඳි මෙට්‍රික් ටොන් තුනක තොගයක් ලබා දී ඇතැයි ද අමාත්‍යවරයා සඳහන් කළේය.
 
අග්‍රාමාත්‍ය රනිල් වික්‍රමසිංහ මහතා සහ තැපැල්, තැපැල් සේවා හා මුස්ලිම් ආගමික කටයුතු අමාත්‍ය එම්.එච්.ඒ.හලීම් මහතා ඉදිරිපත් කළ යෝජනාවකට මෙලෙස අමාත්‍ය මණ්ඩලය අනුමැතිය හිමිව තිබේ.
 
අමාත්‍ය ගයන්ත කරුණාතිලක මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද(16) පැවති කැබිනට් තීරණ දැනුම්දීමේ මාධ්‍ය හමුව අමතමිනි.