(විනීතා එම් ගමගේ)


රනිල් වික‍්‍රමසිංහ මහතා අග‍්‍රාමාත්‍යවරයා ලෙස කටයුතු කළ කාලය තුළ ලබා දුන් වත්කම් බැරකම් ප‍්‍රකාශනය ට‍්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනයට ලබාදෙන ලෙස තොරතුරු දැන ගැනීමේ අයිතිය සඳහා වූ කොමිෂන් සභාව ජනාධිපති ලේකම් කාර්යාලයට නියෝග කර ඇත. 


තොරතුරු දැන ගැනීමේ අයිතිය සඳහා වූ පනත සම්මත වීමත් සමඟ 2017 පෙබරවාරි 3 වැනිදා, තම සංවිධානය ජනාධිපතිවරයාගේ සහ අගමැතිවරයාගේ ප‍්‍රකාශිත වත්කම් බැරකම් ඉල්ලා අයදුම්පත් ඉදිරිපත් කළ අතර අගමැතිවරයාගේ වත්කම් බැරකම් ලබා දීම කොමිසම මගින් දෙවතාවක් ප‍්‍රතික්ෂේප කළ බවත් දෙවතාවක් අභියාචනා ඉදිරිපත් කිරීමෙන් පසු මේ අවස්ථාවේ එය ලබා දෙන ලෙෂ නියෝග කර ඇති  බවත් ට‍්‍රාන්ස්පේරන්සි ඉන්ටනැෂනල් ශ්‍රී ලංකා සංවිධානයේ විධායක අධ්‍යක්ෂ අශෝක ඔබේ සේකර මහතා කොළඹ 2, නිපොන් හෝටලයේ අද  (5) පැවති මාධ්‍ය හමුවක දී ප‍්‍රකාශ කළේය.


තොරතුරු දැන ගැනීමේ පනත යටතේ මෙම වත්කම් ප‍්‍රකාශණය ලබා ගැනීම තුළින් එය ප‍්‍රසිද්ධියට පත් කිරීමට ට‍්‍රාන්ස් පේරන්සි ඉන්ටනැෂනල් ආයතනයට හැකියාව ඇති බවත් මෙම තොරතුරු පෞද්ගලික තොරතුරු වන බවට කළ තර්කය ප‍්‍රතික්ෂේප කරමින් තුන්වන පාර්ශවයන්ට අදාල තොරතුරු ඉවත් කර එම වත්කම් ප‍්‍රකාශනය නිකුත් කළ හැකි බවත් එම කොමිසම සඳහන් කළේ යැයි ද ඔබේසේකර මහතා කීය.


නීති විරෝධීව ධනය එක්රුස් කිරීමේ චෝදනා පිළිබඳව පරික්ෂා කිරීමට හා දුෂණය මැඩලීමේ මෙවලමක් ලෙස දේශපාලඥයින්ගේ වත්කම් ප‍්‍රකාශන භාවිතා කළ හැකි බව තම ආයතනයේ විශ්වාසය යැයි ද ඔබේසේකර මහතා පැවැසීය. 


කෙසේ වෙතත් තොරතුරු දැන ගැනීමේ කොමිසමේ නියෝගය අභියාචනාධිකරණය ඉදිරියේ අභියෝගයට ලක්කිරීමේ හැකියාව ජනාධිපති ලේකම් කාර්යාලයට ඇති නමුත් එවැනි පියවරක් ගැනීමෙන් තම ඡන්දයෙන් පත් කළ ජනතා නියෝජිතයින්ගේ වත්කම් ප‍්‍රකාශන ලබා ගැනීමට ජනතාවට ඇති අයිතිය වගවීම හා විනිවිද භාවය යන සංකල්ප ප‍්‍රවර්ධනය කරන බවට ජනාධිපතිවරයා දුන් ප‍්‍රතිඥා උල්ලංඝණය වන්නේ යැයි ද හෙතෙම පෙන්වා දුන්නේය. 
 
තොරතුරු දැන ගැනීමේ අයිතිය සඳහා වන කොමිසමේ නියෝගය ලැබුණු වහාම එම තොරතුරු තමන් වෙත ලැබෙනු ඇතැයි විශ්වාස කරන බව කී ඔබේසේකර මහතා එය ලැබුණු වහාම ජනතාව අතට පත් කිරීමට තමන් කටයුතු යොදන බව ද සඳහන් කළේය.