(නිමල කොඩිතුවක්කු)
 
ඇතැම් කැබිනට් ඇමැතිවරුන් රට වෙනුවෙන් ගනු ලබන තීන්දු තීරණ දෙස බැලීමේදි කැබිනට් අමාත්‍යවරුන් කොකේන් භාවිතා කරන බවට රන්ජන් රාමනායක මහතා සිදුකළ ප‍්‍රකාශය සත්‍යයක් බවට හැගෙන බව පාර්ලිමේන්තු මන්ත‍්‍රී සුසිල් පේ‍්‍රමජයන්ත මහතා කොළඹදී පැවැසීය.

රටේත් ජනතාවගේත් අනාගතය වෙනුවෙන් තීන්දු තීරණ ගන්නවා වෙනුවට ඇතැම් ඇමතිවරුන්ගේ සුබ සිදධිය වෙනුවෙන් පමණක් තීන්දු තීරණ ගන්නා බවද මන්ත‍්‍රීවරයා සඳහන් කළේය.

පාර්ලිමේන්තු මන්ත‍්‍රී සුසිල් පේ‍්‍රමජයන්ත මහතා මේ බව පැවසුවේ විපක්ෂනායක කාර්යාලයේ අද (19) පැවති මාධ්‍ය හමුවකට එක්වෙමිනි.

එහිදි වැඩිදුරටත් අදහස් දැක්වූ සුසිල් පේ‍්‍රමජයන්ත මහතා මෙසේද කීය.

‘‘පසුගිය දිනවල අග‍්‍රාමාත්‍ය රනිල් වික‍්‍රමසිංහ  මහතා උතුරු පළාතේ සංචාරයක නිරතවුණා. එහිදී විවිධ අදහස් පළ කළා. පලාලි ගුවන්තොටුපළ ඒ 320, 321   ජාත්‍යන්තර මට්ටමේ  ගුවන් යානා මෙහෙයවන්න පුළුවන් ගුවන්තොටුපළක්  බවට පත්කරනවා කිව්වා. මන්නාරමේ සිට ධනූෂ්කොඩි  දක්වා නැවත නැව් සහ බෝට්ටු සේවා ඇති කරනවා කිව්වා. අද දවසේ උතුරේ ජනතාවගේ ප‍්‍රධාන ප‍්‍රශ්නය  මේකද කියලා අපි අහනවා.

පහුගිය 30 අවුරුදු යුද්ධයේ දි නිවාස අහිමි වූ උතුරේ  අහිංසක  ජනතාවට නිවාස පනස් දහසක් හදන්න ඉන්දියානු  ආධාර ලබා දුන්නා. පහුගිය අවුරුදු   හතරක් තිස්සේ එක නිවාසයක් හැදුවද කියලා අපි අහනවා. නිවාස පනස් දහසෙන් එක ගෙයක් හදා ගන්න බැරිවු එක්සත් ජාතික පක්ෂය අද උතුරට ගිහින් ජාත්‍යන්තර ගුවන්තොටුපළවල් ගැන කථා කරනවා.

2009 මැයි 19 වනදා මහින්ද රාජපක්ෂ ආණ්ඩුව යුද්ධය අවසන් කරලා එම ප‍්‍රදේශවල විශාල සංවර්ධනයක් ඇති කළා. පාරවල් කාපට් කරලා, අලූත් පාසල්, රෝහල් ඇතිකළා, කන්කසන්තුරේට යනකම් දුම්රිය මාර්ගය ඇතිකළා. අවුරුදු එකහමාරක් වගේ ඇතුළත සියලූම පහසුකම් ලබා දුන්නා. මේ අය අපෙන් අහනවා ලෝකෙට ණය වෙලා මොනවද කරේ කියළා. අපි කරපු දේ නිසා තමයි අගමැතිතුමාට අද  සුඛෝගභෝගි දුම්රියෙන් යාපනයට යන්න පුළුවන් වුණේ.

මේ ආණ්ඩුවේ ක‍්‍රියාකලාපය  දිහා බලපුවහම  රන්ජන් රාමනායක මහතා කියපු  කාරණා ඇත්තයි කියලත් හිතෙනවා. කොකේන් පාවිච්චි කරලා වගේ තීන්දු තමයි මේ ආණ්ඩුවේ ඇමැතිවරු තීන්දු තීරණ ගන්නේ’’ යැයිද ඔහු එහිදි වැඩිදුරටත් පැවැසිය.