(නිමල කොඩිතුවක්කු)
          
මහමැතිවරණයක් පැවැත්වීමට බලකර සිටීමේ අත්සන් පන්ලක්ෂයේ පෙත්සම කුරුණෑගල දිස්ත්‍රික් පාර්ලිමේන්තු මන්ත්‍රී මහින්ද රාජපක්ෂ මහතා වෙත සංකේතාත්මකව  බාරදීම නාරාහේන්පිට අභයාරාමයේදී අද (06) සිදුකෙරිණි.

මහා සංඝරත්නයේ සෙත් පිරිත් සජ්ඣයනය මධ්‍යයේ එම පෙත්සම පැවිදිහඬ  සංවිධානයේ සභාපති මුරුත්තෙට්ටුවේ ආනන්ද හිමියෝ විසින් මහින්ද රාජපක්ෂ මහතා වෙත භාර දුන්නේය.

මෙම අවස්ථාව සඳහා ඕමාරේ කස්සප ශ්‍රී රෝහන පාර්ශවයේ අනුනායක හිමියෝ, ඇමෙරිකාවේ ප‍්‍රධාන සංඝනායක ආචාර්ය වල්පොල පියනන්ද හිමියෝ, පැවිදිහඬ  සංවිධානයේ ජාතික සංවිධායක ඉත්තෑකන්දේ සද්ධාතිස්ස හිමියෝ, දේශ විමුක්ති ජනතා පෙරමුණේ උපසභාපති ගලගම ධම්මරංසි හිමියෝ ඇතුළු මහා සංඝ රත්නය විශාල පිරිසක් එක්වූහ.

පැවිදිහඬ සංවිධානය ඇතුළු සංවිධාන කිහිපයක් එක්ව මහමැතිවරණයක් පැවැත්වීමට  බලකර සිටීමේ අත්සන් පන්ලක්ෂයේ පෙත්සම පසුගිය 29 වැනි දා ආරම්භ කළේය.

එහිදී අනුශාසනාවක් කරමින් නාරාහේන්පිට අභයාරාමාධිපති සහ පැවිදිහඬ  සංවිධානයේ සභාපති මුරුත්තෙට්ටුවේ ආනන්ද හිමියෝ මෙසේ පැවැසූහ. 

 ‘‘මේ රටේ තිස් අවුරුදු යුද්ධයක් තිබුණා. ඒ යුද්ධය  සමථයකට පත් කරලා සියලූම රට  වැසියන්ට නිදහසේ ජීවත්වීමට අවස්ථාව දුන්නේ මහින්ද රාජපක්ෂ මහතායි. නිදහසේ ජිවත්වූ අපි යම් යම් පිරිස්වල බොරු මත ප‍්‍රකාශයන් වලට ඇහුම්කන් දෙමින්  රටේ වෙනසක් කරන්න  ඕනෑ කියන බලාපොරොත්තුව කොටසකට  තිබුණා. ඒ වෙනසේ දැන් රටේ සියලූ දෙනා හොදින් භුක්ති  විදිමින් සිටිනවා.

මේ වෙනස නිසා අද රට අරාජිකයි. අද රටට අගමැතිවරයෙක් නැහැ,  කැබිනට් එකක් නැහැ. ඒකාධිපති  ස්වරූපයකට අද රට පත්වෙලා තියෙනවා. ඒ සිදුකළ වෙනස වෙනස් කිරිමට අද අපිට සිද්ධ වෙලා තියෙනවා.

රට මෙවැනි අරාජික තත්වයකට පත්වූ හැම අවස්ථාවකදීම මේ රටේ මහා සඟරුවන  ඉදිරිපත් වෙලා රට වෙනුවෙන් කටයුතු කරනවා. අද මේ රට පත්වෙලා තියෙන අවාසනාවන්ත තත්වය  කොච්චර ද කියන එක අද හැමදෙනාටම පෙනි යනවා.’’

(ඡායාරූප - ගයාන් අමරසේකර)