ඉන්දිකා රාමනායක
   
මහනුවර  පොලිස් කොට්ඨාසයේ සහ අනිකුත්  ප‍්‍රදේශ වල සිදු වු ප‍්‍රචන්ඩ කි‍්‍රයා සම්බන්ධයෙන්  නිවාස හා වෙළෙද සැල්වලට අලාභ හානි සිදුකිරීමේ පැමිණිලි 445ක් පොලිස් ස්ථාන වෙත  ලැබී ඇති බව පොලිස් මාධ්‍ය ප‍්‍රකාශ පොලිස් අධිකාරි රුවන් ගුණසේකර මහතා අද (13)  පැවසීය.

 
ඉකුත් මාර්තු (4)  වැනි දින සිට ඊයේ  (12) සවස 6.00 දක්වා කාලය තුළ මෙම පැමිණිලි ලැබී තිබු බවද පොලිස් මාධ්‍ය ප‍්‍රකාශකවරයා සඳහන් කළේය.
 
මින් පැමිණිලි 423ක් මහනුවර පොලිස් කොට්ඨාසයෙන්  ද, සෙසු පැමිණිලි 22 ක දිවයිනේ සෙසු ප‍්‍රදේශ වලින් ද වාර්තා වු බව පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා කියා සිටියේය.
 
පොලිස් මුලස්ථානයේ අද (13) පැවති මාධ්‍ය හමුවකදී පොලිස් මාධ්‍ය ප‍්‍රකාශකවරයා මේ බව කියා සිටියේය.
 
මෙම පැමිණිලි අතර පුජනීය ස්ථාන වලට පහර දීමේ පැමිණිලි 24 ක් ලැබී ඇති බවත් ඉන් 19 ක් මහනුවර කොට්ඨාසයෙන්  බවද ඒ මහතා සඳහන් කළේය.
 
වාහන වලට පහර අලාභ හානි සිදුකිරීමේ  සිද්ධීන් 65වාර්තා වී ඇති බවත් ඉන් පැමිණිලි 60ක් මහනුවර කොට්ඨාසයෙන් ලැබුණු බවද හෙතෙම කීය.
 
තුවාල සිදුකිරීමේ සිද්ධීන් 38 ක් වාර්තා වී ඇති බවත්  ඉන් 22 ක් මහනුවර ලැබී ඇති බවද පොලිස් මාධ්‍ය ප‍්‍රකාශකවරයා සඳහන් කළේය.

මෙම සිද්ධීන් සම්බන්ධයෙන් දිවයින පුරා මේ දක්වා අත්අඩංගුවට ගත් සමස්ත සැකකරුවන් ප‍්‍රමාණය 208 ක් බවත් ඉන් 178ක්  මහනුවර පොලිස් කොට්ඨාසයෙන්  අත්අඩංගුවට ගත් බවද පොලිස් මාධ්‍ය ප‍්‍රකාශකවරයා කීය.

මහනුවර කොට්ඨාසයෙන් අත්අඩංගුවට ගත්   59 දෙනෙක් සාමාන්‍ය නීතිය යටතේ ද, සෙසු 119 දෙනා  හදිසි නීති අවස්ථා නියෝග යටතේ අත්අඩංගුවට ගෙන ඇති බවද ඒ මහතා කියා සිටියේය.
 
මෙම  පිරිසෙන්  128දෙනක් තවදුරටත් රිමාන්ඞ් බාරයේ පසු වන බවත් තවත් 50 දෙනෙකු ඇප මත මුදාහැර ඇති බවද හෙතෙම සදහන් කළේය.
 
දිවයිනේ අනිකුත් ප‍්‍රදේශ වලින් අත්අඩංගුවට ගත් සැකකරුවන් ප‍්‍රමාණය 102 ක්  බවන්  ඉන් 69 ක්  සාමාන්‍ය නීතිය යටතේ ද,  33 දෙනක්  හදිසි අවස්ථා  නියෝග යටතේ  අත්අඩංගුවට ගත් බවද පොලිස් මාධ්‍ය ප‍්‍රකාශකවරයා කීය.