(නවදිල්ලිහිදීය)
අග්‍රාමාත්‍ය නරේන්ද්‍ර මෝදිගේ නායකත්වයෙන් යුත් වත්මන් ඉන්දීය ආණ්ඩුව සෙමින් වුවත් ස්ථීර වශයෙන්ම ප්‍රජාතන්ත්‍රවාදී ආණ්ඩුක්‍රමයක වටිනාකම් අවතක්සේරු කරමින් සිටිනා බව එරට හිටපු අගමැති මන්මෝහන් සිං
චෝදනා කරයි.  


අත්‍යවශයෙන්ම ආරක්ෂා කළ යුතුව තිබෙන ප්‍රජාතන්ත්‍රවාදී ආණ්ඩුක්‍රමයක වටිනාකම් මේ ආණ්ඩුව යටතේ අනතුරට පත්වෙමින් තිබෙන බවට චෝදනා කළ හිටපු අග්‍රාමාත්‍යවරයා අර්ථාන්විත ජාතික විවාදයක් අවශ්‍ය බව ද පෙන්වා දී තිබේ. 


ඉන්දියාවේ හිටපු අමාත්‍යවරයකු සහ කොංග්‍රස් පක්ෂ නායකයකු වන කපිල් සිබාල්ගේ “ෂේඞ්ස් ඔෆ් ටෘත්” කෘතිය එළිදැක්වීමේ අවස්ථාවකට එක්වෙමින් හිටපු අගමැතිවරයා ඉහත කරුණු සඳහන් කළේය. 


අග්‍රාමාත්‍ය නරේන්ද්‍ර මෝදිගේ නායකත්වයෙන් යුත් වත්මන් ආණ්ඩුව ඔවුන් දුන් පොරොන්දු ඉටු කිරීමට අපොහොසත්ව ඇතැයි ද හිටපු අගමැතිවරයා චෝදනා කළේය. 


එහිදි තවදුරටත් අදහස් දැක්වූ හිටපු අගමැති මන්මෝහන් සිං මෙසේ ද පැවැසීය.


“යහපාලනය අත්‍යවශ්‍ය ප්‍රධාන ජාතික ආයතන වෙන කිසිදු දවසක තිබ්බේ නැති විදියේ අත්දැකීම්වලට මුහුණ දී සිටිනවා. ඒ ආයතනවලට නව බාධා එල්ල වී තිබෙනවා. ඉන්දියාවේ අසල්වැසි වටපිටාව 2014 වසරේ තිබුණාට වඩා අනාරක්ෂිත වෙලා තියෙනවා. අසල්වැසියන් හා අප අතර තිබුණ සබඳතා පිරිහිලා. ජාතික පරිවර්තනයක් සඳහා විද්‍යාව සහ තාක්ෂණය නිර්මාණශීලිව භාවිත කිරීමට මෝදිගේ ආණ්ඩුව අසමත් වී තිබෙනවා. 


කාන්තාවන්, දාලිත්වරුන් සහ සුළු ජාතීන්ට ජීවිත් වීමට සුදුසු පරිසරයක් නැහැ. ඔවුන් ජීවත්වන වටපිටාව දිනෙන් දින අනාරක්ෂිත වෙමින් තිබෙනවා. විදෙස් ගත ව තිබෙන කළු මුදල් නැවත රටට ගේනවා කිව්වා. ඒ කිව්ව විදියට විදේශවල තිබෙන ඩොලර් බිලියන ගණන් මුදල් නැවත ඉන්දියාවට ගෙන එන්න කිසිවක් කරලා නැහැ”.



ද ඉකොනොමික් ටයිම්ස් අනුග්‍රහයෙනි
055