(විනීතා එම් ගමගේ)

මධුමාධව අරවින්ද මහතා නීතිවිරෝධීව අත්අඩංගුවට ගෙන රඳවා තබා ගැනීමටත් නඩු පැවරීමටත් එරෙහිව මූලික අයිතිවාසිකම් නඩුකරයක් ගොනු කර ඒ හරහා ඔහු නීතිවිරෝධීව අත්අඩංගුවට ගැනීම වළක්වන වාරණ ආඥාවක් තබා ගැනීමට පිවිතුරු හෙළ උරුමය කටයුතු කරමින් සිටින බව එම පක්ෂයේ ප‍්‍රචාරක ලේකම් නීතිඥ තුෂාර දිසානායක මහතා ප‍්‍රකාශ කලේය.

පොලිසිය කි‍්‍රයාකරමින් සිටින ආකාරය පිළිබඳව කිසිදු විශ්වාසයක් නොමැති බැවින් මෙසේ මූලික අයිතිවාසිකම් පෙත්සමක් ඉදිරිපත් කරන බවත් ශ්‍රේෂ්ඨාධිකරණයට ඉදිරිපත් කළ යුතු පැමිණිල්ල මේ වනවිට කෙටුම්පත් කරමින් සිටින බවත් දිසානායක මහතා කීය.                                                                                                                                                                                            මිනුවන්ගොඩ සිදුවු ප‍්‍රචණ්ඩ ක‍්‍රියා සම්බන්ධයෙන් කෙරෙන විමර්ශනවලට අදාළ ප‍්‍රශ්න කිරීම්වලට කැඳවනු ලැබූ පිවිතුරු හෙළ උරුමයේ නියෝජ්‍ය නායක මධුමාධව අරවින්ද පොලිසිය මඟහරමින් සිටින බවට පොලීසිය ප‍්‍රකාශ කරන බවට පසුගියදා විද්‍යුත් හා මුද්‍රිත මාධ්‍ය වාර්තා කර තිබුණ නමුත් ඔහු පොලිසියට ගියේ යැයි ද හෙතෙම සඳහන් කළේය. 

2019.05.13 වන දින දිවුලපිටිය ප‍්‍රදේශයේ සිටි නාලක නම් හිතවතකුගෙන් මධුමාධව අරවින්ද මහතාට දවල් 12.30 ට පමණ දුරකතන ඇමතුමක් ලැබුණු බවත් ඒ අනුව නාලක හමුවීම ප.ව 7.00 ට නාලකගේ කාර්යාලයේ දී  යොදා ගෙන ඇති බැවින් එහි යද්දී සිද්ධියට මුහුණ දී ඇති බවත් ඔහු ප‍්‍රකාශ කළේය.

වෙනත් මාර්ගවලින් ගොස් මධුමාධව මහතා තම හිතවතා වූ නාලක හමුවිමට කලින් යොදාගත් පරිදි ඔහුගේ ව්‍යාපාරික ස්ථානය වෙත ගමන් ගන්නා අතර ඔහු එම ස්ථානයට පැමිණීමට හා පිටවීමට අදාළ සීසීටීවී දර්ශන තමන් සතුව ඇති බවත් කී ඒ මහතා අදාළ සීසීටිවී දර්ශන ද ඉදිරිපත් කළේය. 

මෙම පිරිසෙන් සමහරු නිරපරාදේ  රක්ෂිත බන්ධනාගාර ගත කර තිබෙන බව හෙළිවී ඇතැයි ද එකී පනතේ 3 වන වගන්තිය යටතේ කරුණු වාර්තා කළහොත් ඇප ලබාගත හැකි වන්නේ මහාධිකරණයෙන් වන අතර එය ද විශේෂ හේතු මත පමණක් බව ද පෙන්වා දුන් දිසානායක මහතා මේ සිද්ධියේ දී විහාරස්ථානයකට රැස් වී සිටි දායක සභාව ද පන්සලේ චෛත්‍යයේ හුණු පිරියම් කරන්නට ආ කම්කරුවන් ද නායක ස්වාමින් වහන්සේ හමුවීමට ආ උන්වහන්සේගේ සොහොයුරා ද පන්සලේ ඇබිත්තයා ද අත්අඩංගුවට ගෙන තිබූ බව හෙතෙම හෙළි කළේය.

ආණ්ඩු පක්ෂයේ නියෝජ්‍ය ඇමතිවරයකු වු එඩ්වඩ් ගුණසේකර මහතා ප‍්‍රසිද්ධියේ කියා සිටියේ මිනුවන්ගොඩ සිද්ධියට මධුමාධව අත්අඩංගුවට ගත යුතු බව වන නමුත් එම සිද්ධිය සඳහා අභූත චෝදනා නගමින් මධුමාධව අත්අඩංගුවට ගැනීමටත් ඒ අනුව විපක්ෂය මේ ගැටුම් මෙහෙයවීම පිටුපස සිටින්නේ යැයි චෝදනා එල්ල කිරීමටත් ආණ්ඩුව පැහැදිලි උත්සහයක් තිබෙන බවත් පිවිතුරු හෙළ උරුමය ප‍්‍රචාරක ලේකම්වරයා කීය.

කෙසේ වෙතත් එම ගැටුම සිදුවන අවස්ථාවේ එම ස්ථානයේ සිටි බවට අනාවරණය වූ චමින්ද සිල්වා පළාත් සභා මන්ත‍්‍රීවරයා ද එඩ්වඩ් ගුණසේකර නියෝජ්‍ය ඇමැතිවරයා ද අත්අඩංගුවට ගැනීම  තබා ප‍්‍රකාශයක් හෝ ලබා ගෙන නැතැයි ද ඔහු පෙන්වා දුන්නේය.

තුෂාර දිසානායක මහතා මේ අදහස් පළ කළේ පිවිතුරු හෙළ උරුමය ප‍්‍රධාන කාර්යාලයේ අද (21) පැවැති මාධ්‍ය හමුවක් අමතමිනි.