ආරක්‍ෂක නිලධාරීන් පිරිවරාගෙන යන්නේ යැයි බොහෝ දෙනා කීවද තමන්ට ලැබී ඇත්තේ ආරක්‍ෂක නිලධාරීන් 10 දෙනෙකු සහ පසුගමන් රථ දෙකක් පමණක් යැයි ආරක්‍ෂක රාජ්‍ය ඇමැති රුවන් විජයවර්ධන මහතා නිවේදනයක් නිකුත් කරමින් කියා සිටී.

“ආරක්‍ෂක රාජ්‍ය ඇමැතිවරයා වශයෙන් මට ලැබී ඇත්තේ ආරක්‍ෂක නිලධාරීන් 10 දෙනෙකු පමණයි. ඔවුන් අතුරින් එක වැඩමුරයකදී සේවය ලබාගත හැක්කේ නිලධාරීන් 6 දෙනකුගෙන් පමණයි. වාහන වශයෙන් ඇත්තේ පසුගමන් රථ දෙකක් පමණයි”‍

“මා සෑම අවස්ථාවකදීම මගේ පෞද්ගලික වාහන මගේ ගමන් බිමන් සඳහා යොදාගන්නා අතරම කිසිම නිල නිවාසයක්ද  මෙතෙක් ලබාගෙන නැත” යයි ද රුවන් විජයවර්ධන මහතා වැඩිදුරටත් කියා සිටී. 

පසුගිය 15 වැනිදා මිනුවන්ගොඩ නගරයේ නිරීක්‍ෂණ චාරිකාවක යෙදුණු අවස්ථාවේදී තමන් සමග සිටි ඉහළ පෙළේ ආරක්‍ෂක නිලධාරීන් සහ අනෙකුත් භට පිරිස් කිසිම ආකාරයකින් තමන්ගේ ආරක්‍ෂක පිරිවරට අයත් නොවන බව ආරක්‍ෂක රාජ්‍ය ඇමැතිවරයා අවධාරණය කරයි.

වැඩබලන ආරක්‍ෂක ඇමැතිවරයා වශයෙන්, මිනුවන්ගොඩ නගරයේදී සිදුවූ අලාභ හානි නිරීක්‍ෂණය කිරීම සඳහා කළ චාරිකාවේදී පහත සඳහන් ජ්‍යෙෂ්ඨ ආරක්‍ෂක නිලධාරීහුද එම අවස්ථාවට පැමිණ සිටියහ. 


■ සමස්ත මෙහෙයුම් අණදෙන නිලධාරී, මේජර් ජනරාල් එස්. ලියනගේ
■ රියර් අද්මිරාල් සුජීව පෙරේරා
■ එයාර් වයිස් මාෂල් ලෙනාඩ් රුද්‍රිගු
■ එයාර් වයිස් මාෂල් පායෝ
■ 141 වැනි සේනාංකයේ අණදෙන නිලධාරී, බ්‍රිගේඩියර් ජයවර්ධන
■ ජ්‍යෙෂ්ඨ නියෝජ්‍ය පොලිස්පති රොෂාන් විජේසිංහ
■ මිනුවන්ගොඩ පොලිස්ථානාධිපති 

මෙම නිලධාරීන් ප්‍රදේශයේ ආරක්‍ෂාව සම්බන්ධයෙන් සොයාබැලූ අය බවත්, මෙම ජ්‍යෙෂ්ඨ නිලධාරීන්ට අමතරව යුද හමුදා මෝටර් සයිකල් කණ්ඩායමත්, සන්නාහ සන්නද්ධ රථ දෙකකුත් එම ස්ථානයේ තිබුණු අතර ඒවා ප්‍රදේශයට ආරක්‍ෂාව සැපයූ කණ්ඩායම් බවත් රාජ්‍ය ඇමැතිවරයාගේ නිවේදනයේ වැඩිදුරටත් සටහන් වේ.