( තිළිණි ද සිල්වා සහ රංජන් කටුගම්පොළ )
නොබෝදා සිදුවූ මරාගෙන මැරෙන ත‍්‍රස්ත ප‍්‍රහාරය සම්බන්ධයෙන් බුද්ධි අංශ මඟින් දැනුම්වත් කර තිබියදීත්  ඊට නිසි පියවර නොගැනීමෙන් ජනතාවගේත්, තමන්ගේත් අයිතිවාසිකම් කඩවී ඇති බව සඳහන් කරමින් ඒ පිළිබඳ පරීක්ෂණයක් පවත්වන ලෙසද , සුදුසු වන්දි මුදල් ප‍්‍රදානය කරන ලෙසද ඉල්ලා කතෝලික පියතුමන්ලා තිදෙනෙකු සහ ශ්‍රී ලංකා නීතීඥ සංගමය අද (21) ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් දෙකක් ගොනු කර තිබේ.
 
හෙන්රි මේරියන් අශෝක් ස්ටීවන් ,සරත් ඉද්දමල්ගොඩ සහ හේල් එවන්ස්ටන් ප‍්‍රනාන්දු ජයවර්ධන යන පියතුමන්ලා සහ ශ්‍රී ලංකා නීතීඥ සංගමයේ කළමනාකාර කමිටුව විසින් ගොනු කර ඇති මෙම පෙත්සම් වල වගඋත්තරකරුවන් ලෙස හිටපු ආරක්ෂක අමාත්‍යාංශ ලේකම් හේමසිරි ප‍්‍රනාන්දු , පොලිස්පති පූජිත ජයසුන්දර ,අගමැති රනිල් වික‍්‍රමසිංහ මහතා ඇතුළු අග‍්‍රාමාත්‍ය මණ්ඩලය නම් කරනු ලැබ ඇත.
 
පසුගිය අපේ‍්‍රල් 21 වැනිදා ත‍්‍රස්ත ප‍්‍රහාරය හේතුවෙන් දිවයිනේ ප‍්‍රකට කතෝලික දේවස්ථාන සහ හෝටල් කිහිපයක් විනාශ විය.මිනිස් ජීවිත තුන්සියක් අතර ප‍්‍රමාණයක් අහිමි වූහ.හයසියකට අධික පිරිසක් තුවාල ලැබූහ.
 
මෙම ප‍්‍රහාරය පිළිබඳ බුද්ධි අංශ මඟින් පුර්ව දැනුම් දීමක් කර තිබියදීත් ඒ පිළිබඳ රජය නිසි පියවර ගෙන නොමැත.
 
මේ හේතුවෙන් පෙත්සම්කරුවන්ගේත් , ජනතතාවගේත් මූලික අයිතිවාසිකම් කඩවී ඇත. එබැවින් පෙත්සම්කරුවන්ගේ අයිතිවාසිකම් කඩ වී ඇති බව ප‍්‍රකාශ කරන ලෙසද මේ පිළිබඳ සුදුසු පරීක්ෂණයක් පැවැත්වීමට නියෝග කරන ලෙසද සිද්ධියෙන් හානි වූ පුද්ගලයින්ට වන්දි ගෙවීමට නියෝග කරන ලෙසද පෙත්සම්කරුවෝ සිය පෙත්සම්වලින් ඉල්ලා සිටිති.