(සුජිත් හේවාජුලිගේ සහ ආරියරත්න රණබාහු)

බ්‍රිතාන්‍ය පාර්ලිමේන්තු මන්ත්‍රී ඉයන් පෙස්ලි මහතා මෙරට සංචාරයක යෙදීමට ඉකුත් රජය සමයේදී විදේශ කටයුතු අමාත්‍යංශය මගින් නියමිත ක්‍රමවේද උල්ලංඝණය කරමින් රුපියල් එක් කෝටි පනස් ලක්ෂයක මුදලක් වැය කිරීමේ සිද්ධිය ගැන පරීක්ෂණ පැවැත්වීමට රහස් පොලිසියට හා පොලිස් මූල්‍ය අපරාධ කොට්ඨාසයට බාරදෙන බව විදේශ කටයුතු ඇමැති තිලක් මාරපන මහතා පාර්ලිමේන්තුවේදී අද (7) පැවසීය.

විදේශ කටයුතු අමාත්‍යාංශයේ හිටපු නිලධාරීන් දෙදෙනකු මෙම බ්‍රිතාන්‍ය මන්ත්‍රීවරයා මගින් නයිජීරියාවේ ඉන්ධන සමාගමක් සම්බන්ධ කරගෙන කිරීමට ගියේ යැයි කියන ඉන්ධන ගනුදෙනුවක් ගැන ද සොයා බලන බව ඇමැතිවරයා කීය.

නයිජීරියාවේ සිද්ධිය බරපතළ එකක් බව කී මාරපන මහතා ඒ ගැන විධිමත් පරීක්ෂණයක් පැවැත්වීමට අමාත්‍යංශ ලේකම්වරයාට පවරන බවද ප්‍රකාශ කළේය.

මාරපන මහතා මේ බව පැවැසුවේ පත් කළ මන්ත්‍රී බිමල් රත්නායක මහතා මේ පිළිබඳව ඉදිරිපත් කළ සභාව කල් තබන අවස්ථාවේ යෝජනාව සම්බන්ධයෙන් පැවැති විවාදයේ පිළිතුරු කතාව කරමිනි.

මේ බ්‍රිතාන්‍ය පාර්ලිමේන්තු මන්ත්‍රීවරයා අවස්ථා ගණනාවකදී මෙරට සංචාරය කර ඇති බවත් ඔහුට සුපිරි හෝටල් වෙන් කිරීම හා හෙලිකොප්ටර් ගමන් වෙනුවෙන් රුපියල් එක් කෝටි පනස් ලක්ෂයක මුදලක් වැය කර ඇති බවත් බිමල් රත්නායක මහතා මේ යෝජනාව ඉදිරිපත් කරමින් පැවැසීය.

මේ සංචාරවලින් රටට ලැබුණු කිසිවක් නැතැයිද ඔහු කීය.