අග්‍රාමාත්‍ය රනිල් වික්‍රමසිංහ මහතා එම තනතුරේ තව දුරටත් රැඳී සිටිමින් රාජ්‍ය පාලනය මෙහෙයවීම ගැන ශ්‍රී ලංකා පක්‍ෂයට එකඟ විය නොහැකි බැවින් පාර්ලිමේන්තුවේ බහුතරයකගේ ගෞරවය හා කැමැත්ත දිනාගත හැකි මන්ත්‍රීවරයෙකු එම ධූරයට පත්කර නව රජයක් පිහිටුවිය යුතු බව එක්සත් ජනතා නිදහස් සන්ධානයේ මහ ලේකම් අමාත්‍ය මහින්ද අමරවීර, ශ්‍රී ලංකා නිදහස් පක්‍ෂයේ ජාතික සංවිධායක අමාත්‍ය සුසිල් ප්‍රේමජයන්ත යන මහත්වරුන් විසින් ජනාධිපතිවරයාට ලිපියක් යොමු කරමින් දන්වා  තිබේ.

පළාත් පාලන මැතිවරණයේදී ලද ඡන්ද සංඛ්‍යාව කෙරෙහි අග්‍රාමාත්‍ය රනිල් වික්‍රමසිංහ මහතා ගත් ඇතැම් තීන්දු ඍජුව බලපෑ බව ද ඔවුන් සිය ලිපියේ සඳහන් කර තිබේ. 

එහි වැඩිදුරටත් මෙසේ ද දැක්වේ.


“ පසුගිය මහ මැතිවරණයෙන් පසු එක්සත් ජාතික පක්ෂය හා එක්සත් ජනතා නිදහස් සන්ධානය සම්මුතිවාදී රජයකට එකඟ වූයේ වර්ෂ 2ක් සඳහාය. එම කාලය දැන් ඉකුත් වී ඇත. පසුගිය වසර 2 1/2ක කාලය තුළ සම්මුති රජයේ ආර්ථික, ව්‍යවස්ථා ප්‍රතිසංස්කරණ, විදේශ කටයුතු, අධිකරණය, නීතිය හා සාමය වැනි ප්‍රධාන විෂයයන් පිළිබඳ වගකීම දරන ලද්දේ එක්සත් ජාතික පක්ෂය හා  අග්‍රාමාත්‍ය රනිල් වික්‍රමසිංහ මැතිතුමාගේ නායකත්වයෙන්, ගනු ලැබූ සමහර තීරණ සම්බන්ධව ප්‍රතිපත්තිමය එකඟතාවලට එළඹීම දුෂ්කර වුවද, සාමූහික වගකීමට අප මැති ඇමැතිවරු ගරු කරන ලදී.

එහෙත් පසුගිය පළාත් පාලන මැතිවරණයේදී එල්ල වූ ප්‍රධාන චෝදනාවක් වූ වංචා දූෂණ මැඩපැවැත්වීම වෙනුවට මහ බැංකු බැඳුම්කරය වැනි මහා පරිමාණ වංචා  අග්‍රාමාත්‍යතුමාගේ දැනුම මත සිදුවී ඇති බව රටට රහසක් නොවේ. ආර්ථික කළමනාකරණ හා යහපාලන මූලධර්මවලට පිටුපෑම ඇතුළු අපටද එකඟ විය නොහැකි දේශීයත්වය රැකගන්නා වැඩපිළිවෙළකට යාම වෙනුවට එහි ප්‍රතිවිරුද්ධ ප්‍රතිපත්තියක් මත පිහිටා ගනු ලබන තීරණ නිසා පළාත් පාලන මැතිවරණයේ ප්‍රතිඵල වර්තමාන ජනමතය පිළිබිඹු කර ඇත.

එම නිසා එක්සත් ජාතික පක්ෂය ලද ඡන්ද සංඛ්‍යාව මත ගරු අග්‍රාමාත්‍යතුමා එම තනතුරේ තවදුරටත් රැඳී සිටිමින් රාජ්‍ය පාලනය මෙහෙයවීම අප පක්ෂයට එකඟ විය නොහැක. එම නිසා පාර්ලිමේන්තුවේ බහුතරයකගේ ගෞරවය හා විශ්වාසය දිනා ගත හැකි මන්ත්‍රීවරයකු අග්‍රාමාත්‍යධුරයට පත් කර නව රජයක් පිහිට විය යුතු යැයි අප අදහස් කරමු.

ඒ සඳහා ශ්‍රී ලංකා නිදහස් පක්ෂය ප්‍රමුඛ එක්සත් ජනතා නිදහස් සන්ධානයට අවස්ථාව ලබා දෙන මෙන් ගෞරවයෙන් ඉල්ලා සිටිමු”.