(අකිල බද්දෙවිතාන)

කොළඹ රථවාහන තදබදය අවම කිරීමේ අරමුණින් නියමු ව්‍යාපෘතියක් ලෙස අත්හදා බැලූ බස් රථ සඳහා ප්‍රමුඛතා මංතීරුව හඳුන්වාදීමේ වැඩසටහන ඉදිරියටත් ක්‍රියාත්මක කරන්නේ ද යන්න සම්බන්ධයෙන් අද (20) සවස තීරණය කරන බව මාර්ග සංවර්ධන අධිකාරිය පවසයි.

මහ නගර හා බස්නාහිර සංවර්ධන අමාත්‍ය පාඨලී චම්පික රණවක මහතා සහ මාර්ග සංවර්ධන අධිකාරියේ නිලධාරීන් ඇතුළු පිරිසක් සමග එම සාකච්ඡාව පැවැත්වීමට නියමිත බවත් දැනට ලැබී ඇති වාර්තා අනුව බස් රථ සඳහා රාජගිරිය මංසන්ධියේ සිට ආයුර්වේද මංසන්ධිය දක්වා ක්‍රියාත්මක කළ ප්‍රමුඛතා මංතීරු වැඩපිළිවෙළ සාර්ථක බවත් මාර්ග සංවර්ධන අධිකාරියේ අධිවේගී මාර්ග සැලසුම් නියෝජ්‍ය අධ්‍යක්ෂ සමන් විදානපතිරණගේ මහතා පැවසීය.

පසුගිය මාර්තු 12 වැනිදා සිට සතියක කාලයක් මෙම වැඩසටහන ක්‍රියාත්මක කෙරුණු අතර මුල් දිනවලදී වෙනත් වාහන බස් මංතීරුවට ඇතුළු කළද ක්‍රමයෙන් එම වැඩපිළිවෙළට නැඹුරුවූ රියදුරන් විනයක් සහිතව ධාවනය කළ අයුරු දැකිය හැකිවූ බවද ඒ මහතා කීවේය. එමෙන්ම සතියේ දිනවල පෙරවරුවේ වෙනදා එම පෙදෙසේ ඇතිවන රථවාහන තදබදය අවම මට්මක පැවැති බවට තමාට බොහෝ පිරිසක් දැනුම් දුන් බවද ඒ මහතා කීවේය.