(නාලක සංජීව දහනායක සහ සුජිත් හේවාජුලිගේ)

ශ්‍රී ලංකා පොදුජන පෙරමුණේ පළමු ජාතික මහා සම්මේලනය විපක්‍ෂනායක මහින්ද රාජපක්‍ෂ මහතාගේ ප‍්‍රධානත්වයෙන් අද (11) පස්වරු 3.00 ට සුගතදාස ගෘහස්ත ක‍්‍රීඩාංගනයේදී පැවැත්වේ.

එහිදී පළමුවෙන්  වත්මන් විපක්‍ෂනායක මහින්ද රාජපක්‍ෂ මහතා ශ්‍රී ලංකා පොදුජන පෙරමුණේ පක්‍ෂ නායකත්වයට පත්කර ගැනීමට නියමිතය. පසුව ඔහු විසින් එම පෙරමුණේ ජනාධිපතිවරණ අපේක්‍ෂකයාගේ නම නිල වශයෙන් ප‍්‍රකාශයට පත් කිරීමට නියමිතය.

අනතුරුව පක්‍ෂය සඳහා නව නිළධාරී මණ්ඩලයක් පත්කර ගැනීමද මෙහිදී සිදුවන අතර ශ්‍රී ලංකා නිදහස් පක්‍ෂය නියෝජනය කරන පාර්ලිමේන්තු මන්ත‍්‍රීවරුන් කණ්ඩායමක් ද එම සම්මේලනයට සහභාගී වීමට නියමිත බවද වාර්තා වේ.

මෙම සම්මේලනය සඳහා සහභාගී වන කාන්තාවන්ට කුරහන් පැහැති ඔසරියෙන් සැරසී පැමිණෙන ලෙස දන්වා ඇති අතර පිරිමි පාර්ශවයට ජාතික ඇඳුමින් සැරීසී පැමිණෙන ලෙස ද දන්වා ඇත.

සම්මේලනය අවසන් වීමෙන් පසුව නව ජනාධිපතිවරණ අපේක්‍ෂකයා එදින සවසම කැලණිය විද්‍යාලංකාර පිරිවෙනට හා කැලණිය රජමහා විහාරයට පැමිණ මහා සංඝරත්නය බැහැ දැක ආගමික වතාවත් සඳහා සහභාගී වීමට නියමිතය.

මෙම සම්මේලනය සඳහා ශ්‍රී ලංකා පොදුජන පෙරමුණ ප‍්‍රමුඛ ඒකාබද්ධ විපක්‍ෂයට සහය දක්වන සියලූම දේශපාලන පක්‍ෂවලට, වෘත්තීය සමිති නියෝජිතයන්, කලාකරුවන්, තනාපතිවරුන් විදෙස්ගත ශ්‍රී ලාංකිකයන් ඇතුළු විශාල පිරිසකට ආරාධනා කර තිබේ.