(තරිඳු ජයවර්ධන,  තිළිණි ද සිල්වා සහ බිඟුන් මේනක ගමගේ) 

ජනාධිපතිවරයා විසින් පාර්ලිමේන්තුව විසිරුවාහැරිනු ලැබීමට එරෙහිව අධිකරණයේ ගොනු කර ඇති පෙත්සම් කැඳවීම හෙට උදෑසන 10 දක්වා කල් තැබීමට අධිකරණය අද නියෝග කළේය.
 
ජනාධිපතිවරයාගේ ගැසට්ටුව අවලංගු කරන ලෙස ඉල්ලමින් අද උදේ පෙත්සම් 12ක් අධිකරණයට ඉදිරිපත් කර තිබුණු අතර නීතිපතිවරයා පැමිණෙන තෙක් එම පෙත්සම් කැඳවීම අද සවස 2 දක්වා කල් තබා තිබිණි.
 
ඒ අනුව අද පස්වරු 2.10ට පමණ අගවිනිසුරුවරයා ප්‍රමුඛ ත්‍රිපුද්ගල විනිසුරුමඩුල්ල ඉදිරියේදී නඩුව යළි කැඳැවිණි.  පෙත්සම් 12න් පෙත්සම් අටකට අදාලව කරුණු දැක්වීම අද පස්වරු 5.20 පමණ වන තෙක් සිදු කෙරිණි.
 
ඉන් පසු අදට පෙත්සම්වල කරුණු විමසීම නතර කරළ අතර යළිත් වරක් හෙට උදේ 10ට පෙත්සම් යළි කැඳවීමට අධිකරණය නියම කළේය.
 
මෙම පෙත්සම් සම්බන්ධයෙන් අධ්‍යයනය කිරීමට කල් අවශ්‍ය බව නීතිපතිවරයා දැනුම් දුන්නේය.
 
දෙමළ ජාතික සන්ධානය , එක්සත් ජාතික පක්ෂය , ජනතා විමුක්ති පෙරමුණ , දෙමළ ප්‍රගතශීලි සන්ධානය    ඇතුළු පක්ෂ ද පුරවැසියන් කිහිප දෙනෙක් ද මෙම පෙත්සම්  ගොනු කරනු ලැබ තිබිණි.

නීතිපතිවරයා, මැතිවරණ කොමිෂන් සභාවේ සභාපතිවරයා ඇතුළු සාමාජිකයෝ සහ මැතිවරණ කොමසාරිස් ජනරාල්වරයා මෙම පෙත්සම්වලින් වගඋත්තරකරුවන් කරනු ලැබ සිටිති.

මෙම පෙත්සම විභාගය ගැනීමට අවසර දෙන ලෙසත්, පෙත්සම් විභාගය අවසන් වන තෙක් මැතිවරණය අත්හිටුවීමේ අතුරු නියෝගයක් ලබා දෙන ලෙසත් පෙත්සම් කරුවෝ ඉල්ලා සිටියහ.

පෙත්සම් විභාගය දැක බලා ගැනීමට මැති ඇමැතිවරු, නීතීඥවරු, මාධ්‍යවේදීහු ඇතුළු විශාල පිරිසක් අධිකරණයට පැමිණ සිටියහ.


( තිළිණි ද සිල්වා සහ ළහිරු හර්ෂණ )

පාර්ලිමේන්තුව විසුරුවා හැරීමට එරෙහිව එක්සත් ජාතික පක්ෂය, දෙමළ ජාතික සන්ධානය ඇතුළු  පක්ෂ රැසක් ශ්‍රේෂ්ඨාධිකරණය හමුවේ ගොනු කළ පෙත්සම් 11 ක් අද (12) සළකා බලන බව අධිකරණ ආරංචි මාර්ග කියා සිටී.

ඒ අනුව මෙම පෙත්සම් අගවිනිසුරු නලීන් පෙරේරා, ප්‍රසන්න ජයවර්ධන සහ ප්‍රියන්ත ජයවර්ධන යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ කැදවනු ලැබේ.

මේ වන විට ආණ්ඩු පක්ෂය නියෝජනය කරමින් අමාත්‍ය විමල්  වීරවංශ , එක්සත් ජාතික පක්ෂයෙන් මංගල සමරවීර,  දෙමළ ජාතික සන්ධානයෙන් ඒම්.ඒ සුමන්තිරන්, එක්සත් ජාතික පක්ෂය, ජනතා විමුක්ති පෙරමුණ මෙන්ම දෙමළ ජාතික සන්ධානය ද මෙලෙස ශ්‍රේෂ්ඨාධිකරණය හමුවේ පෙත්සම් ගොනු කර ඇත.

ශ්‍රේෂ්ඨාධිකරණයෙන් සාධාරණයක් බලාපොරොත්තුවෙන් මෙලෙස පෙත්සමක් ගොනු කරන බව එක්සත් ජාතික පක්ෂය කියා සිටියි.

ඡායාරූප - ළහිරු හර්ෂණ