(ඉන්දිකා රාමනායක සහ නිමන්ති රණසිංහ )

පානදුර එළුවිල මුස්ලිම් පල්ලියට ප‍්‍රහාරයක් එල්ල කිරීමේ සිද්ධිය සම්බන්ධයෙන් අත්අඩංගුවට ගැනීමට සොයමින් සිටි සරසවි සිසුවකු අද (19)  කොළඹ අපරාධ විමර්ශන කොට්ඨාසය විසින් අත්අඩංගුවට ගනු ලැබූ බව  පොලිසිය කියයි.
මෙම සැකකරු සබරගමුව විශ්ව විද්‍යාලයේ කළමනාකරණ පීඨයේ සිසුවෙක්  බවත් ඔහු නීතිඥවරයකු මාර්ගයෙන්   කොළඹ අපරාධ  විමර්ශන කොට්ඨාසයට බාරවීමෙන් පසු අත්අඩංගුවට ගත් බවත් වාර්තාවේ.
සැකකරු ඇතුළු පිරිසක් ඉකුත් මැයි 17 වැනිදා එළුවිල මුස්ලිම් පල්ලියට ප‍්‍රහාර එල්ල  කළැයි කියන සිද්ධියක් සම්බන්ධයෙන් ලැබුණු පැමිණිලි මත කොළඹ අපරාධ විමර්ශන කොට්ඨාසය පරීක්ෂණ ආරම්භ කර ඇති බව පොලිසිය කියයි.
එම පරීක්ෂණ අනුව මෙම සිද්ධියට සම්බන්ධ සැකකරුවන් පස් දෙනකු මීට පෙර අත්අඩංගුවට ගෙන පානදුර මහේස්ත‍්‍රාත් අධිකරණයට ඉදිරිපත් කිරීමෙන් පසු මෙම මස 30 දක්වා  රිමාන්ඞ් බාරයට පත්කර ඇත.
එම සැකකරුවන් පස්  දෙනා අතර භික්ෂුන් වහන්සේ නමක්,  පොලිස් කොස්තාපල්වරයෙක්,  මුස්ලිම් ජාතිකයින් දෙදෙනකු හා ද්‍රඩිඩ ජාතිකයෙක් සිටින බවද පොලිසිය කියයි.