(රංජන් කස්තුරි)

සුනඛ ජලභීතිකා රෝග මර්දන වැඩසටහන නැවත සෞඛ්‍ය අමාත්‍යාංශය යටතට පවරා ගැනීමේ තීරණයට විරෝධය දක්වමින් රටපුරා පශූ වෛද්‍ය නිලධාරීහු මේ මස 26 වැනිදා ලෙඩ නිවාඩු වාර්තා කර සේවයට නොපැමිණ සිටීමේ වෘත්තීය සමිති ක්‍රියාමාර්ගයක නිරත වීමට සුදානම් වෙති.

මෙතෙක් කලක් සුනඛ ජලභීතිකා රෝග මර්දන වැඩසටහන සත්ව නිෂ්පාදන හා සෞඛ්‍ය දෙපාර්තමේන්තුව යටතේ පශූ වෛද්‍ය නිලධාරීන් සිදුකළ අතර ඔවුන්ගෙන් එම කටයුත්ත ඉවත් කිරීමට සෞඛ්‍ය ඇමැතිවරයා කැබිනට් පත්‍රිකාවක් ඉදිරිපත් කර තිබෙන බවද රජයේ පශූ වෛද්‍ය නිලධාරීන්ගේ සංගමයේ සභාපති වෛද්‍ය රුවන් වික්‍රමආරච්චි මහතා පැවැසීය.

ඉකුත් 2018 වසරේ සිට සුනඛ එන්නත් කටයුතු පශූ වෛද්‍යවරුන් මගින් සිදුකරන අතර එය ඉතා සාර්ථකව දිවයින පුරා සිදු කෙරෙන හෙයින් මෙවැනි තීන්දුවක් ගැනීම පදනම් විරහිත බවද ඔහු කීය.

සෞඛ්‍ය ඇමැතිවරයාගේ එම තීන්දුවට විරෝධය දැක්වීම සඳහා මේ මස 26 වැනිදින රටපුරා පශූ වෛද්‍යවරු එම වෘත්තීය ක්‍රියා මාර්ගය ගන්නා බවද වෛද්‍ය වික්‍රමආරච්චි මහතා පැවැසීය.

පශූ වෛද්‍යවරුන්ගේ ලෙඩ නිවාඩු ව්‍යාපාරය නිසා රටපුරා සතුන්ගේ එන්නත් කටයුතු සිදු කිරීම නතර වන අතර  කටුනායක ජාත්‍යන්තර ගුවන් තොටුපොළහි සත්ව නිරෝධන කටයුතු නතර වන බවද ඔහු සඳහන් කළේය.

මීට අමතරව නගරවල මස්කඩ පරීක්ෂාව සත්ව උද්‍යාන රාජකාරී සහ වන ජීවී කටයුතු නතර වන බවද සභාපතිවරයා පැවැසීය.