(ඩයනා උදයංගනී)

                  

නැගෙනහිර පළාතේ බොහෝ ස්ථානවල සහ පොළොන්නරුව, මුලතිව් සහ කිලිනොච්චිය යන දිස්ත‍්‍රික්කයන්හි හෙට (15) දිනයේ දී දැඩි උණුසුම් කාලගුණ තත්ත්වයක් ඇතිවිය හැකි බව කාලගුණ විද්‍යා දෙපාර්තමේන්තුව පවසයි.

එම ප‍්‍රදේශයන් හි සෙල්සියස් අංශක 39 ඉක්මවූ උෂ්ණත්වයක් පැවතිය හැකි අතර වැඩි වේලාවක් උෂ්ණත්වයට නිරාවරණය වුවහොත් දැඩි තෙහෙට්ටුව, විජලනය හා ලවණ ඉවත්වීම හේතුවෙන් මස්පිඬු පෙරළීම වැනි තත්ත්වයන් ඇතිවිය හැකි බව කාලගුණ විද්‍යා දෙපාර්තමේන්තුව මගින් නිකුත් කළ උණුසුම් කාලගුණ තත්ත්ව පිළිබඳ අවවාදාත්මක නිවේදනයේ දැක්වේ.

එබැවින් වැඩබිම් තුළ කටයුතු කරන අය ඇතුළු සියලූ දෙනා ප‍්‍රමාණවත් ලෙස ජලය පානය කිරීම හා සෙවණ ඇති තැන්වල විවේක ගැනීම කළ යුතු බවත්, වැඩිහිටි සහ රෝගී පුද්ගලයන් පිළිබඳ සැළකිලිමත් විය යුතු බවත්, කුඩා ළමුන් තනිව වාහන තුළ රඳවා නොයාම හා අධික වෙහෙසකර කටයුතු සීමා කිරීම වැනි පියවර අනුගමනය කළ යුතු බවත් එහි සඳහන් වේ.

දිවයිනට දැනට බලපා ඇති උණුසුම්කාරී කාලගුණ තත්ත්වය තවත් දෙසතියක් පමණ පවතිනු ඇතැයි කාලගුණ විද්‍යා දෙපාර්තමේන්තුවේ ප‍්‍රකාශිකාවක් පැවසුවාය.