(මුදිත දයානන්ද)

 
රනිල් වික‍්‍රමසිංහ මහත්තයාට නැවත අගමැතිකම ලබාගන්න දෙමළ ජාතික සන්ධානය සහය දුන්නේ ඔවුන් අතර ඇති කරගත් එකඟතාවයකට අනුව බව සුමන්තිරන්ලා කැබිනට් මණ්ඩලය ගැන උතුරේදී කරන ප‍්‍රකාශ අනුව පැහැදිලි වෙනවා යැයි ජාතික නිදහස් පෙරමුණේ නායක පාර්ලිමේන්තු මන්ත‍්‍රී විමල් වීරවංශ මහතා අද (16) පැවසීය.

          විරවංශ මහතා මෙසේ පැවසූයේ පිටකෝට්ටේ පිහිටි ජාතික නිදහස් පෙරමුණේ ප‍්‍රධාන කාර්යාලයේදි පැවති මාධ්‍ය හමුවකදීය.
 
එහිදි තවදුරටත් අදහස් දැක්වු වීරවංශ මහතා මෙසේද පැවසීය.

          දෙමළ ජාතික සන්ධානයේ සුමන්තිරන් හා මාවේයි සේනාධිරාජා මන්ත‍්‍රීවරු දෙන්නා උතුරේ ස්ථාන දෙකකදි වෙන වෙනම කළ ප‍්‍රකාශ දෙකක් අද පුවත්පතක පළවී තිබෙනවා. ඔවුන් දෙදෙනාම කියනවා එයාලගෙන් අහන්නේ නැතිව කැබිනට් මණ්ඩලයට තීන්දු ගන්න බැහැ කියලා. එක්සත් ජාතික පක්ෂයට නැවත බලය ගන්න සහය දීමේදි ඇති කරගත් එකගතාවයන් තමයි මේ එළියට එන්නේ.

          සුමන්තිරන්ලා මේ කරන ප‍්‍රකාශ ගැන අපිට අදහස් ගන්න පුලූවන් ඇමති මණ්ඩලය පත් කළ ආකාරය දිහා බැලූවාමත්. කලින් තිබුණ ආණ්ඩුවේ උතුර සංවර්ධන ඇමතිකම දුන්නේ ස්වාමිනාදන් මහත්තයාටයි. ඒ වෙලාවෙන් දෙමළ ජාතික සන්ධානය කියලා තිබුණා ඇමතිකම ඔයා තියාගන්න ඒත් උතුරේ වැඩ කරන්නේ අපි කියලා. ඒකට එතුමා ඒතරම් එකගතාවයක් දක්වා තිබුණේ නැහැ. ඒ නිසා තමයි මේ වතාවේ ඇමතිකම් අගමැති රනිල් වික‍්‍රමසිංහ මහතා තමන් යටතේ තිබෙන ඇමතිකම් ගොන්න අතරට උතුර සංවර්ධන ඇමතිකමත් ගත්තේ.

 

ඒකට මුදල් වෙන් කළාට වැඩ කරන්නේ දෙමළ ජාතික සන්ධානය. ඔවුන්ගේ උවමනාව ඉටු කරන්න තමයි මේ විදිහට කරන්නේ.

          පහුගිය දවස්වල ව්‍යවස්ථා සම්පාදක මණ්ඩලයට ලියවිල්ලක් දැම්මා. මේක ව්‍යවස්ථා කෙටුම්පතක් කියලා සුමන්දිරන් උතුරේදී කියා තිබෙනවා. රනිල් මහත්තයා කොළඹදී කියනවා ඒක කෙටුම්පතක් වත් නෙවෙයි කියලා. අපි කියන්නේ මේ තමයි ෆෙඩරල් ව්‍යවස්ථා මුට්ටිය. මුට්ටයට රිදෙන්න ගැහුවේ නැත්නම් ඊළග ප‍්‍රතිපලය පිටිපස්සෙන් එනවා. මේකේ තියෙනවා ඉඩම් බලතල, පොලිස් බලතල, 
 

අධිකරණ බලතල ඉල්ලලා. ඒවා හැම පළාතකටම ඉල්ලන්නේ උතුරට දෙන්න  ඕන නිසා මිසක් අනෙක් පළාත්වලට අවශ්‍ය නිසා නෙවෙයි. දැන් මහාසංඝරත්නයට කියන්න  ඕන දේවල් ටික දඹර අමිල හිමි ලවා කියවන්න පටන් අරන්. දැන් උන්වහන්සේ මහානායක හිමිවරුන්ටත් තර්ජනය කරන තත්ත්වයට පත්වෙලා. මේ තමන්ට ලැබෙන සන්තෝෂම් වලට  තමයි කෑ ගහන්නේ. ඒ අය මොනවා කිව්වත් මේ රට බෙදන්න ඉඩ දෙන්න අපිට බැහැ. අපි මේ ව්‍යවස්ථා උගුල පරාජයට පත් කළ යුතුයි.