(රංජිත් රාජපක්ෂ)

මධ්‍යම කඳුකරයේ බටහිර බෑවුම් ප්‍රදේශවලට තවදුරටත් ඇද හැලෙන අධික වර්ෂාවෙන්, ගිනිගත්හේන නගරයට බලපෑ නායයාමේ අවදානම් තත්ත්ව හේතුවෙන් නගරයේ වෙළඳසැල් 7ක හිමියන් සහ සේවකයන් අද (13) ඉවත් කිරීමට පියවර ගත් බව අඹගමුව ප්‍රාදේශීය සභාවේ සභාපති ජයසංඛ පෙරේරා මහතා පැවසීය.

ගිනිගත්හේන නගරයේ කොළඹ මාර්ගයේ දෙමහල් ගොඩනැගිල්ලක පවත්වාගෙන ගිය මුද්‍රණාලයක් තුළට අද පස් කන්දක් කඩා වැටීමෙන් මුද්‍රණාලය සහ ඊට පහළ මහලේ වූ ඖෂධ වෙළඳසැලක සේවකයින් ඉවත් කිරීමට පියවර ගත් බව සභාපතිවරයා කියා සිටියේය.

ගිනිගත්හේන නගරයේ මීට ප්‍රථම නාය ගිය සහ නායයමේ අවදානමට ලක්ව ඇති වෙළඳසල් 42කට අමතරව තවත් වෙළඳසැල් 7ක පිරිස ඒවායින් ඉවත් කළ බවද ඔහු කීය.

හැටන් කොළඹ ප්‍රධාන මාර්ගයේ දියගල ප්‍රදේශයේ නායයාමේ දැඩි අවධානමක් පවතින නිසා එම  මාර්ගයේ රථ වාහන ධාවනය නොකර විකල්ප මාර්ග ඔස්සේ රථ වාහන ධාවනය කරන ලෙස අඹගමුව ප්‍රාදේශිය සභාවේ සභාපතිවරයා ඉල්ලා සිටියේය.