(තරිඳු ජයවර්ධන සහ දිනේෂ් උපේන්ද්‍ර)

වයඹ සරසවියේ සිසුන් පිරිසකට පහර දුන්නේ යැයි සැකපිට එම විශ්වවිද්‍යාලයේම ජ්‍යෙෂ්ඨ සිසුන් 12 දෙනකු අද රාත්‍රී අත්අඩංගුවට ගත් බව කුලියාපිටිය පොලිසිය කියයි.

පළමු වසරේ ඉගෙනුම ලබන සිසුන් පිරිසක් එලෙස පහරකෑමට ලක්ව තිබූ අතර, ඔවුන් නවකවදයට එරෙහිව කටයුතු කර ඇති බව පොලිසිය සඳහන් කරයි.

වයඹ සරසවියේ පළමු වසර සිසුන්ට නිශ්චිත ඇඳුමකින් සැරසී සරසවියට පැමිණෙන ලෙස ජ්‍යෙෂ්ඨ සිසුන් උපදෙස් දී ඇති බවත්, සිසුන් 30 දෙනකු පමණ සාමාන්‍ය ඇඳුමින් සැරසී දේශනවලට ගොස් ඇති බවත් පොලිසිය කියයි.

එදින රාත්‍රියේ නවකවදයට එරෙහිව මූලිකත්වය ගත් සිසුන් තිදෙනකු මෝටර් රථයක නැගී රාත්‍රී ආහාරයට යමින් සිටියදී විශ්වවිද්‍යාල පරිශ්‍රය තුළදීම එම පහරකෑමට ලක්වූ බව ඔවුන් පොලිසියට දුන් ප්‍රකාශවල සඳහන් වේ.

පහර දීම සිදු වී සති තුනක් ගත වුවද සැකකාර ජ්‍යෙෂ්ඨ සිසුන් අත්අඩංගුවට නොගැනීම සම්බන්ධයෙන් පහර කෑ සිසුහු පසුගිය සතියේ පොලිස්පතිවරයාට, පොලිස් කොමිසමට හා මානව හිමිකම් කොමිසමට පැමිණිලි කළහ.

ඒ අනුව අද අත්අඩංගුවට ගත් සිසුන් 12 දෙනා හෙට (21) කුලියාපිටිය මහේස්ත්‍රාත් අධිකරණයට ඉදිරිපත් කිරීමට නියමිතය.