පුෂ්පකුමාර ජයරත්න

 

හිටපු වෙළඳ ඇමැති ජොන්ස්ටන් ප්‍රනාන්දු ඇතුළු තිදෙනකුට එරෙහිව පවරා ඇති නඩුව වාර්තා කිරිම සඳහා කිසිදු මාධ්‍යවේදීයකුට මහාධිකරණයට ඇතුළු වීම තහනම් කරමින් කුරුණෑගල මහාධිකරණ විනිසුරු මේනකා විජේසුන්දර මහත්මිය අද (11) නියෝගයක් නිකුත් කළාය.

ලංකා සතොස සමාගමට අයත් කුරුණෑගල යන්තම්පලාව ශාඛාවෙන් භාණ්ඩ තොගයක් ගෙන ඊට අදාළ ගෙවීම් පැහැර හැරීමේ චෝදනාවට අදාළ නඩුව අද (11) කුරුණෑගල මහාධිකරණයේ දී කැඳවිණි.

එම නියෝගයට අනුව පැමිණ සිටි මාධ්‍යවේදීන්ට මහාධිකරණයට යාමට ප්‍රධාන ගේට්ටුවෙන් කුරුණෑගල අධිකරණ පරිශ්‍රයටවත් ඇතුළු වීමට ආරක්ෂාව යොදවා සිටි පොලිස් නිලධාරිහු ඉඩ නොදුන්හ.

කුරුණෑගල ප්‍රාදේශීය මාධ්‍යවේදීන්ට කුරුණෑගල අධිකරණයේ විභාගවන නඩුවක් වාර්තා කිරිම තහනම් කෙරුණු ප්‍රථම අවස්ථාව මෙය වේ.

හිටපු වෙළඳ ඇමැති ජොන්ස්ටන් ප්‍රනාන්දු ඇතුළු ඔහුගේ පෞද්ගලික ලේකම්වරයකු වු මොහොමඩ් හකීර් සහ සතොස  හිටපු සභාපතිවරයකු වු නලීන් ප්‍රනාන්දු යන තිදෙනාට එරෙහිව නීතිපතිවරයා විසින් අධිචෝදනා ගොනු කර තිබේ.

නඩුව අද (11) දින සිට අඛණ්ඩව විභාගයට ගැනීමට නියමිතය.