(ආරියරත්න රණබාහු හම්බන්තොට සිට)

ගිං- නිල්වලා යෝජනා ක්‍රමය සිදු නොකිරීම සම්බන්ධයෙන් පසුගිය රජයෙන් සිදුවූ දේවල් පිළිබඳව පරීක්ෂණයක් පැවැත්වෙන ආකාරයට ම මෙම රජයේ අය එම යෝජනා ක්‍රමය ප්‍රමාද කිරීම ගැන පරීක්ෂණ පැවැත්වීමට සිදුවනු ඇතැයි ජනාධිපති මෛත්‍රීපාල සිරිසේන මහතා හම්බන්තොටදී අද(10) පැවසීය.


ඊට අදාළ කැබිනට් පත්‍රිකාව කැබිනට් මණ්ඩලයට ඉදිරිපත් නොකර සිටිම පිළිබඳව කරුණු තමා දන්නා බව පැවසු ජනාධිපතිවරයා ඒවා තමාගේ මුවින් ප්‍රසිද්ධියේ ප්‍රකාශයට පත් කිරීමට ඉඩ නොතබන ලෙසද ඒ පිළිබඳ වගකිව යුතු දේශපාලන බලධාරින්ට සිහිපත් කරන බව කීය.


එම බලධාරීන්ට තමන්ගේ දේශපාලන වටිනාකම ආරක්ෂා කරගෙන කටයුතු කරන ලෙස ද ජනාධිපතිවරයා ඉල්ලා සිටියේය.
මාගම් රුහුණුපුර ජාත්‍යන්තර සම්මන්ත්‍රණ ශාලාවේදී අද(10) පෙරවරුවේ පැවති පුරන් කුඹුරු අස්වැද්දීමේ ජාතික වැඩසටහන පිළිබඳව ගොවීන් දැනුම්වත් කිරීමේ ගොවිහමුව අමතමින් ඒ බව කී ජනාධිපතිවරයා මෙසේ ද කීය.


‘මෙහිදී ගිං-නිල්වලා ගැන කිව්ව ගොවි මහත්තුරු මට සංදේශයකුත් දුන්නා. ඒ සම්බන්ධයෙන් පසුගිය ආණ්ඩු කාලයේදී මොකද වුණේ කියලා තමුන්නාන්සේලා දන්නවා. ඒ ගැන වෙනම පරීක්ෂණයක් පැවතෙනවා.


දැන් මේ ආණ්ඩුවෙනුත් ගිං නිල්වලා යෝජනා ක්‍රමය ප්‍රමාදවීම ගැන නැවත පරීක්ෂණයක් කරන්න වෙයි කියලා මට පේනවා. ප්‍රමාද ඇයි කියලා මම ඒ කාරණයත් දන්නවා. මම ඒක මෙතැන තියන්නේ නැහැ.’

ඡායාරූප - චතුර එස් කොඩිකාර