(යොහාන් භාසුර)

ශ‍්‍රී ලංකා ක‍්‍රිකට් ආයතනයට විදේශ රූපවාහිනී නිෂ්පාදන සමාගමකින් ලැබීමට නියමිත රුපියල් මිලියන 900 කට අධික මුදලක් වංචා කිරීමට සැළසුම් කළේ යැයි කියන ශ්‍රී ලංකා ක‍්‍රිකට් ආයතනයේ මූල්‍ය අංශයේ නිලධාරියා පසුගිය දින දෙකේ සේවයට වාර්තා කර නොමැති බව ශී‍්‍ර ලංකා කි‍්‍රකට් ආයතනයේ උසස් නිලධාරියෙක් පැවසීය.
 
 මෙම නිලධාරියාගේ සේවා නිල කාමරයට මේ වන විට මුද්‍රා තබා ඇති අතර ඔහු සේවයට පැමිණියහොත් අවශ්‍ය කටයුතු කරගෙන යාම සඳහා වෙනත් ස්ථානයක් ලබාදෙන බව එම නිලධාරියා වැඩිදුරටත් පැවසීය. 

එංගලන්ත පිලේ ශ්‍රී ලංකා සංචාරයේ රූපවාහිනී විකාශන අයිතිය වෙනුවෙන් සුප‍්‍රසිද්ධ විදේශ රූපවාහිනී ආයතනයකින් ශ්‍රී ලංකා ක‍්‍රිකට් ආයතනයට ඩොලර් මිලියන 5.5 ක මුදලක්  ලැබීමට නියමිතය.  

”අපි මේ සම්බන්ධයෙන් එෆ්.සී.අයි.ඞී. යට පැමිණිලි කරලා තියෙන්නේ ඒ පරීක්‍ෂණයට අපි සහයෝගය දෙනවා. ඔහු ස්ථිරවම වරදකරු වන තෙක් අපිට රැකියාව අත්හිටුවන්න බෑ. ඒ නිසා ඔහු සේවයට පැමිණිය හොත් වෙනත් තැනක් සුදානම් කරලා දෙනවා” යැයි එම නිලධාරියා වැඩි දුරටත් පැවසීය. 

චෝදනාලාභී නිලධාරියා මෙම දැවැන්ත මුදල ආසියානු කළාපයේ රටක ඔහුගේ පෞද්ගලික ගිණුමකට තැන්පත් කරවීමට සැළසුම් කර ඇති බවට චෝදනා එල්ල වී තිබේ. 

ශ්‍රී ලංකා ක‍්‍රිකට් ආයතනයේ මූල්‍ය ප‍්‍රධානියා මේ පිළිබඳව දැනුවත්වීමෙන් අනතුරුව ප‍්‍රධාන විධායක නිලධාරීවරයා දැනුවත් කර ඇති බව වාර්තා වේ.

ගණකාධිකාරීවරයකු යැයි කියන මෙම පුද්ගලයා ශ්‍රී ලංකා ක‍්‍රිකට් ආයතනයේ සේවයට පැමිණීමට පෙර සංචාරක ව්‍යාපාරයට සම්බන්ධ රාජ්‍ය ආයතනයක සහ රාජ්‍ය මුදල් සම්බන්ධ දුෂණ විමර්ෂණය කරන කොමිසමකට සම්බන්ධව සේවය කර ඇති බවද වාර්තා වේ.