(ගාල්ල අමල් වික්‍රමරත්න සහ හබරාදුව නිමල් අල්ගේවත්ත)

හබරාදුව විවිධ සේවා සමුපාකාර  සංගමයට අයත් ග්‍රාමීය බැංකු ශාඛාවල තැන්පත් කර තිබූ රුපියල් කෝටි 4 කට ආසන්න මුදල් ප්‍රමාණයක්  අවභාවිතා කිරීම නිසා ගනුදෙනු කරුවන් විශාල පිරිසක් විශාල අපහසුතාවයකට ලක්වී ඇතැයි අනාවරණයවේ. දකුණු පළාතේ තිබෙන විවිධ සේවා සමුපාකාර සංගම් 34 අතුරින් කිහිපයක් හැරෙන්නට අනිකුත් සංගම් සියල්ලද මෙවැනිම  අන්ත දුෂිත තත්වයකට පත් වී ඇතැයිද දකුණු පළාත්  කෘෂිකර්ම, වාරිමාර්ග, ගොවිජන සංවර්ධන, ජලසම්පාදන හා ජාලාපවහන, ආහාර සැපයුම් හා බෙදාහැරීම් සහ වෙළද හා සමුපාකාර සංවර්ධන අමාත්‍ය යු. ජි. ඩි. ආරියතිලක මහතා පවසයි.

මෙම කරුණු අද 19 සවස දක්ෂිනපාය සිය අමාත්‍යංශයේ පැවති මාධ්‍ය හමුවකදී අදහස් දක්වමින් ආරියතිලක මහතා එසේ පැවසීය  එහිදී තවදුරටත් කරුණු දැක්වූ අමාත්‍ය වරයා මෙසේද පැවසීය.

හබරාදුව විවිධ සේවා සමුපාකාර සමිතියට අයත් ග්‍රාමීය බැංකු ශාඛාවල මුදල් තැන්පත් කළ ගිණුම් හිමියන්ට  ඔවුන්ගේ තැන්පත් මුදල් ලබා ගැනීමට ගියවිට එම මුදල් ලබාගැනීමට නොහැකිවෙලා. පසුගිය දින කිහිපයේ අමාත්‍යංශයට පැමිණිලි කළ හා අදහස්  දැක්වූ පිරිස පමණක් 40 කට අධිකයි. 

මේ වනවිට ගනුදෙනු කරුවන් 14 ආසන්න පිරිසක් හබරාදුව පොලීසියට පැමිණිලි කර ඇති අතර රුපියල්  ලක්ෂ   තුනකට වඩා ග්‍රාමීය බැංකු ශාඛාවල  මුදල් තැන්පකළ  පිරිසක්ද සිය මුදල් ලබා නොදෙන බව පවසමින් ගාල්ල පොලිසියට ද පැමිණිලි කර තිබේ. තවත් පිරිසක් සිය පැමිණිලි කිරීමට පොලිසි ගියද ඔවුන්ට තව දින කිහිපයක් ඉවසා සිටිනලෙස පවසා පැමිණිලි ලියා නොගෙන ඇතැයි තමාට දැනගන්නට ලැබී ඇතැයිද  අමාත්‍යවරයා පැවසීය.

නීතියේ තිබෙන හිඩැස් නිසා මෙම සිද්ධිවලට සම්බන්ධ පුද්ගලයින් සමුපකාර කොමසාරිස් වරයා මගින් කරනු ලබන පරීක්ෂණ වලටද සහයෝගය නොදෙන තත්වයකට පත්ව ඇතැයිද පවසන අමාත්‍යවරයා මෙවැනි චෝදනා ලබන පුද්ගලයනට මහජන මුදල් ගසාකමින් එම තනතුරුවල රැදී සිටීමට නීතිය තුලින්ම  අවස්ථාව ලැබී තිබීම කණගාටුවට කරුණක් බවද පැවසීය.