(යොහාන් භාසුර)
 
ශ‍්‍රී ලංකා ක‍්‍රිකට් ආයතනයේ මූල්‍ය අංශ ප‍්‍රධානියකු ඩොලර් මිලියන 5.5 ක් හෙවත් රුපියල් මිලියන 900 කට අධික මුදලක් වංචා කිරීමට සූදානම් වූයේ යැයි කියන සිද්ධියක් පිළිබඳව ශ්‍රී ලංකා ක‍්‍රිකට් ආයතනය පොලිස් මූල්‍ය අපරාධ කොට්ඨාසයට අද  (10) පැමිණිළි කළේය.

මෙම තත්ත්වය හමුවේ ශ්‍රී ලංකා ක‍්‍රිකට් ආයතනයේ මූල්‍ය අංශයේ නිලධාරීන් කීපදෙනකු එම අංශයෙන් මාරු කිරීමට ද ක‍්‍රිකට් ආයතන බලධාරීන් පියවර ගෙන තිබේ.

චෝදනා ලාභී නිලධාරියාගේ සේවය පිළිබඳ තීරණය අද පස්වරුවේ ගැනීමට නියමිතව තිබිණි. 
අදාල මූල්‍ය ප‍්‍රධානියා කිරීමට සූදානම් වූයේ යැයි කියන දැවැන්ත මූල්‍ය වංචාවක් පිළිබඳව ශ්‍රී ලංකා ක‍්‍රිකට් ආයතනයේ ප‍්‍රධාන විධායක නිලධාරී ඈෂ්ලි ද සිල්වා මහතා ඇතුළු නිලධාරීහූ පොලිස් මූල්‍ය අපරාධ කොට්ඨාසයට පැමිණිලි කළහ.

එංගලන්ත ක‍්‍රිකට් කණ්ඩායමේ එළඹෙන ශ්‍රී ලංකා සංචාරයේ රූපවාහිනී විකාශන අයිතිය වෙනුවෙන් ශ්‍රී ලංකා ක‍්‍රිකට් ආයතනයට විදේශ රූපවාහිනී ආයතනයකින් ලැබීමට නියමිත ඩොලර් මිලියන 5.5 ක මුදල චෝදනාලාභී ප‍්‍රධානියාගේ ඔහුගේ පෞද්ගලික ගිණුමකට බැර කිරීමට සූදානම් වී ඇති බව වාර්තා වේ.

අදාල නිලධාරියා මෙම මුදල පෞද්ගලික ගිණුමකට බැර කරන ලෙස එම රූපවාහිනී ආයතනයට දැනුම්දී ඇති අතර ඒ පිළිබඳව එම ආයතනය ක‍්‍රිකට් ආයතනයේ ප‍්‍රධානීන් දැනුවත් කර තිබේ.

ශ්‍රී ලංකා ක‍්‍රිකට් ආයතනය උසස් නිලධාරියකුගෙන් මේ පිළිබඳව අද (10) පස්වරුවේ කළ විමසුමකදී ඔහු පැවසුවේ එහි මූල්‍ය අංශයේ පසුගිය වසරක ගනුදෙනු සම්බන්ධයෙන් විගණන පරීක්‍ෂණයක් පවත්වන බවයි.
‘‘මෙහිදී වංචාවක් කරන්න අවස්ථාව ලැබුණේ නෑ. අපි ඒ පිළිබඳව වහාම අවශ්‍ය කටයුතු කළා. ක‍්‍රීඩා අමාත්‍යවරයාගේ උපදෙස් අනුව ඉදිරි කටයුතු කරනවා’’ යැයි එම නිලධාරියා වැඩිදුරටත් පැවසීය.

මෙම පුද්ගලයා ශ්‍රී ලංකා ක‍්‍රිකට් ආයතනයේ හිටපු ප‍්‍රබලයකුගේ සමීප හිතවතකු බවත් පසුගිය පරිපාලනය සමයේ ක‍්‍රිකට් ආයතනයේ සේවයට බදවාගෙන ඇති බවත් වාර්තා වේ.