(ඩයනා උදයංගනී)

කොළඹ, කොළොන්නාව, කඩුවෙල යන ප‍්‍රදේශවලින් එක් රැස්වන කසල බැහැර කෙරෙන කෙරවළපිටිය කසළ අංගනයෙන් දිනකට ටොන් 1,300ක් භාරගන්නා බව සංඛ්‍යා ලේඛනවල සඳහන් වුවත් ගෙනැවිත් ඇත්තේ කසළ ටොන් 600ක් බව පසුව හෙළිවූ බව මහ නගර හා බස්නාහිර සංවර්ධන අමාත්‍ය පාඨලී චම්පික රණවක මහතා පැවසීය.

කසල ගෙන එන ලොරි රථවල බර කිරීම සඳහා තරාදියක් සවි කිරීමෙන් පසු මෙම කරුණ හෙළිදරව් කරගැනීමට හැකි වූ බව ද අමාත්‍යවරයා කීවේය.

කොළොන්නාව නගර සභාවේ ද කසළ ටොන් 40ක් බැහැර කෙරෙන බව සඳහන්ව තිබුණත් බැහැර කර ඇත්තේ ටොන් 12ක් බව හෙළිවී ඇතැයි කී අමාත්‍යවරයා පසුගිය කාලයේ කසළ මාෆියාව හේතුවෙන් සිදු වූ වංචනික ක‍්‍රියා රැසකට වැට බැඳීමට මේ වන විට හැකි වී ඇතැයි ද කීවේය.

මහනගර හා බස්නාහිර සංවර්ධන අමාත්‍යාංශය යටතේ කි‍්‍රයාත්මක ඝන අපද්‍රව්‍ය කළමනාකරණ ව්‍යාපෘතිය මගින් හඳුන්වා දෙනු ලබන මහල් නිවාසයන් හි ‘සම්පත් පියස’ විවෘත කිරීම අද (13) සිදුකෙරුණු අතර එම අවස්ථාවට එක් වෙමින් අමාත්‍ය පාඨලී චම්පික රණවක මහතා මේ බව සඳහන් කළේය.

සාලමුල්ල ලක්සඳ සෙවන, මාළිගාවත්ත සියසෙත සෙවන, රාජගිරිය රෝයල් පාර්ක් යන මහල් නිවාසයන් හි ‘සම්පත් පියස’ විවෘත වූ අතර දිරණ කසළ නිවසේදී කොම්පෝස්ට් බවට පත් කර ගත හැකි කොම්පොස්ට් බඳුනක් එම නිවැසියන්ට ලබාදීම ද මෙහිදී සිදුවිය.