(උපාලි ආනන්ද)

තන්තිරිමලේ සහ සිලාවතුර සීමාවේදී කල්ලාරු ඇතා වෙඩි තබා ඝාතනය කිරීම සම්බන්ධයෙන් සැකපිට රිමාන්ඩ් භාරයේ සිටින සැකකරුවන් තිදෙනා මේ මස 26වැනිදා තෙක් යළි රිමාන්ඩ් කරන ලෙස අනුරාධපුර ප‍්‍රධාන මහේස්ත‍්‍රාත් හර්ෂණ කැකුනවෙල මහතා අද(12) නියෝග කළේය.

මෙසේ තවදුරටත් රිමාන්ඞ් කෙරුණේ සිලාවතුර පොලිස් වසමේ සිවිල් ආරක්ෂක කමිටුවේ මෙන්ම සිලාවතුර  මුස්ලිම් පල්ලියේ සභාපතිවරයාද වන සිලාවතුර මරච්චිකට්ටි පාලෙන්කුලී පදිංචි 52 හැවිරිදි මීරා සාහීඩ් හාරිස් සහ මන්නාරම දකුණ කරවන්කොට්ටෙයි තිරුවල්ලූවර පදිංචි 38 හැවිරිදි සුන්දර මූර්ති වෙට්ට්විල් අලගන් සහ සිලාවතුර මරච්චිකටිටි මුල්ලිකුලම් හි පදිංචි 54 හැවිරිදි ප‍්‍රැන්සිස් සෙබස්තියන් වාස් යන සැකකරුවන්ය.

ඇත් දළ යුගලෙහි කොටස් ඞී එන් ඒ පරික්ෂණයක් සඳහා යවා  ඊට අදාල වාර්තාව අධිකරණයට ඉදිරිපත් කරන ලෙසද  අනුරාධපුර පොලිස් කොට්ඨාස අපරාධ විමර්ශන අංශයට නියෝග කළ විනිසුරුවරයා මෙම අපරාධය සමිබන්ධයෙන් සිදු කෙරෙන විමර්ශන කඩිනම් කරන ලෙසටද නියෝග කළේය.

දැනට ජාතික සත්වෝද්‍යාන දෙපාර්තෙමින්තුව බාරයේ පවතින ඇත් දළ යුගලෙන් කොටසක් එම ඞී එන් ඒ පරික්ෂණය සඳහා ලබා දෙන ලෙසට මහේස්ත‍්‍රත්වරයා ජාතික සත්වෝද්‍යාන දෙපාර්තෙමින්තුවේ අධ්‍යක්ෂ ජනරාල්වරයාටද නියෝග කරනු ලැබීය.

මේ අතර ඇත් දළ යුගල සම්බන්ධයෙන් වැඩිදුර පරික්ෂණ සදහා ඒවා කැබලි දෙකකට කැපීමට අවසර ලබා දෙන්නැයි ජාතික සත්වෝද්‍යාන දෙපාර්තමේන්තුවේ අධ්‍යක්ෂ ජනරාල්වරයා කළ ඉල්ලීමකටද මහේස්ත‍්‍රත්වරයා අධිකරණයේ අවසරය ලබා දුන්නේය.