තිළිණි ද සිල්වා
 
ඕස්ටේ‍්‍රලියාවේ සරණාගත භාවය ඉල්ලා සංක‍්‍රමණය වූ එල්.ටී.ටී.ඊ සැකකරුවෙකු එරටින් පිටුවහල් කර යළි ශ්‍රී ලංකාවට එවීමට එරට බලධාරීන් තීන්දු කර ඇතැයි ගාඩියන් පුවත්පත් අද (13) වාර්තා කළේය.
 
මෙලෙස යළි දිවයිනට එවීමට තීන්දු කර ඇත්තේ ශාන්තා රූබන් නැමැති එල්.ටී.ටී.ඊ සැකකරුවෙකි.මොහු ලබන 22 වැනිදාට පෙර එරටින් පිටුවහල් කිරීමට එරට බලධාරීන් තීන්දු කර තිබේ. 
 
ඉකුත් 2012 වසරේදී ශ්‍රී ලාංකික සරණාගතයෙකු ලෙසින්  ඕස්ටේ‍්‍රලියාවට පැමිණි මෙම සැකකරු එරට රුඳී සිටීමට සරණාගතයින් පිළිබඳ එක්සත් ජාතීන්ගේ මහකොමසාරිස් කාර්යාලය ලබා දුන් අවසරයද ප‍්‍රතික්ෂේප කරමින් මොහු පිටුවහල් කරනු ලැබ ඇත.
 
එරට සරණාගතභාවය ඉල්ලා මෙම එල්.ටී.ටී.ඊ සැකකරු යොමුකළ අයදුම් පත වසර දෙකහමාරට ආසන්න කාලයක්  ඕස්ටේ‍්‍රලියා දේශසීමා සහ ආගමන විගමන බලධාරීන්ගේ විමර්ශනයට භාජනය වී ඇති අතර අදාළ අයදුම්පත යොමු කිරීමේදී මොහු එල්.ටී.ටී.ඊ සංවිධානය හා එක්ව කටයුතු කළ බව සඟවා ඇතැයිද සඳහන් වේ. 
 
ඕස්ටේ‍්‍රලියානු සරණාගතභාවය ලබා ගැනීමට ලංකාවේදී තමන්ට වද හිංසාවන් එරට සිදුවන බවට සඳහන් කරමින් ශ්‍රී ලංකාවේ පාර්ලිමේන්තු මන්ත‍්‍රීවරයෙකු ගෙන් ලිපියක්  ඕස්ටේ‍්‍රලියානු බලධාරීන්ට ඉදිරිපත් කර ඇත. 
 
 
 
පසුව එරට දේශසීමා සහ ආගමන විගමන බලධාරීන් සිදු කළ පරීක්ෂණ වලින් එමඟින් තහවුරු වී ඇත්තේ ඔහු එල්.ටී.ටී.ඊ සංවිධානයට අයත් මුහුදු බලකා සාමාජිකයෙකු වශයෙන් කටයුතු කර ඇති බවද සඳහන් වේ.මෙම ලියකියවිලි ඉදිරිපත් කරමින් එරට රුඳී සිටීමට සරණාගතයින් පිළිබඳ එක්සත් ජාතීන්ගේ මහකොමසාරිස් කාර්යාලය හරහා තාවකාලික අවසරයක්ද 2015 වසරේදී සැකකරු ලබා ගෙන තිබිණි.
 
මෙම සැකකරු කරුණු වසන් කරමින්  ඕස්ටේ‍්‍රලියාවේ සරණාගතභාවය ඉල්ලීම නිසා ඔහු ඉදිරිපත් කළ අයදුම්පත ප‍්‍රතික්ෂේප කරමින් මොහුව එරටින් පිටුවහල් කිරීමට අදාළ බලධාරීන් තීන්දු කර ඇත.