(චමිල් රූපසිංහ)

පස් සාම්පල පරීක්ෂාව අදාළ ස්ථානයේදීම පහසුවෙන් සිදුකළ හැකි පරිගණක මෘදුකාංගයක් නිර්මාණය කිරීමට පේරාදෙණිය විශ්ව විද්‍යාලයේ ඉංජිනේරු පීඨයේ අවසන් වසරේ ඉගෙනුම ලබන චතුරංගී එදුසූරිය නැමැති ශිෂ්‍යාව සමත්ව තිබේ.

ලොව රටවල් ගණනාවක නව නිපැයුම් කරුවන්ගේ සහභාගීත්වයෙන් (COINS) ආයතනය වාර්ෂිකව පවත්වනු ලබන තරඟයෙන්  එම ශිෂ්‍යාව ප්‍රථම ස්ථානය හිමිකර ගනු ලැබ තිබේ.

මෙම නවීන නිපයුම මගින් මාර්ග ඉදි කිරීමේදී සිදුකළ යුතු ප්‍රමුඛතම කාර්යයක් වන පස් සාම්පල පරීක්ෂාව අදාළ ස්ථානයේදීම පහසුවෙන් සිදුකළ හැකි පරිගණක මෘදුකාංගයක් ඇය විසින් නිර්මාණය කර ඇත.

අන්තර් ජාලය ඔස්සේ අදාළ දත්ත ජංගම දුරකතනයට ලබා ගත හැකි බවද චතුරංගී පැවසීය.

ඇමරිකාව,චීනය හා එංලන්තය සමඟ එංගලන්තයේදී පැවැති මෙම තරඟාවලියේ අවසන් වටය සඳහා නව නිපැයුම් කරුවන් හය දෙනෙකු තේරුණු බවත් ලොව පිළිගත් මහචාර්යවරුන් ගෙන් සමන්විත විනිශ්චය මණ්ඩලයක් ඒ අතරින් හොඳම නිර්මාණය ලෙස තම නිර්මාණය තෝරා ගත් බවත් ඇය සඳහන් කළේය.

අධිවේගි මාර්ග ඇතුළු ප්‍රධාන මාර්ග ඉදි කිරීමේදී පස් සාම්පල පරීක්ෂාව සඳහා විද්‍යාගාර වලට ගෙන යා යුතු බවත් මේ සඳහා අධික වියදමක් මෙන්ම කාලයක්ද ගත වන බවත් කී චතුරංගී නව නිර්මාණය ක්‍රියාවට නැන්වීම මගින් මුදල් මෙන්ම කාලයද ඉතිරි කරගත හැකි යැයිද ප්‍රකාශ කළාය.

පේරාදෙණිය විශ්ව විද්‍යාලයේ සිවිල් ඉංජිනේරු දෙපාර්තුමේන්තුවේ මහචාර්ය එස්.බී.එස් අබේකෝන් මහතාගේ අධීක්ෂණය යටතේ ඇය විසින් මෙම නිර්මාණය සිදුකර තිබේ.

පශ්චාත් උපාධි අපේක්ෂක ජානක වික්‍රමසූරිය මහතාගේ සංකල්පයක් මත මෙම පස් සාම්පල අදාළ ස්ථානයේදීම පරීක්ෂා කිරීමට අවශ්‍යය පරීක්ෂණ සිදුකළ බවත් එය ප්‍රතිපල ජංගම දුරකතනයටප පහසුවෙන් ලබාගත හැකි මෘදුකාංගය තමන් නිර්මාණය කළ බවද ඇය ඇය සඳහන් කළේය.