ඩී.ජී.සුගතපාල
 
නීති විරෝධි ගිනි අවි සහ පුපුරණ ද්‍රව්‍ය සන්තකයේ තබා ගැනීම සහ ප්‍රවාහනය කිරිම සම්බන්ධයෙන් සැකකරුවන් තිදෙනෙකුට එරෙහිව පවරා ඇති නඩුව ගාල්ල ප්‍රධාන මහේස්ත්‍රාත් හර්ෂණ කැකුණවෙල මහතා හමුවේ අද (11) විභාගයට ගත් අවස්ථාවේ කටහඬ පරික්ෂණයක් සඳහා දෙවැනි සැකකරු රජයේ රස පරික්ෂණවරයා වෙත ඉදිරිපත් කිරිමට අපරාධ පරික්ෂණ දෙපාර්තමේන්තුවට අවසර ලබා දුන්නේය.


මහේස්ත්‍රාත්වරයා මෙසේ අවසර ලබාදුන්නේ සැකකරු නැව් අතර සම්බන්ධතා පැවැත්විම සම්බන්ධයෙන් කටහඬ පරික්ෂණයක් සඳහා අපරාධ පරික්ෂණ දෙපාර්තමේන්තුවේ නිලධාරියෙකු සමඟ රජයේ රස පරික්ෂකවරයා වෙත ඉදිරිපත් කිරිමට නියෝගයක් නිකුත් කරන ලෙස කරන ලද ඉල්ලීමක් සළකා බැලීමෙන් පසුවය. 


ඇවන්ගාඩ් නෞකාවේ කපිතාන්වරයාවු ගෙනඩි ගැව්රිලොව් පාවෙන අවි ගබඩාවේ අවි බාරකරුවන දොන් තෝමස් ඇල්බට් විජේතුංග තිලකරත්න  සහ එහි මෙහෙයුම් කළමනාකරුවන මිල්ලනියගේ  සුමුදු නිලුපුල් කොස්තා යන සැකකරුවන් තිදෙනාට එරෙහිව මෙම නඩුව පවරා ඇත.


පළමු සැකකරුගේ නීතිඥවරයා කරුණු දක්වමින් කියා සිටියේ ඔහු මෙම ගිනි අවිවලට කිසිදු සම්බන්ධයක් නොමැති අතර ඔහු කලේ කපිතාන් හැටියට රැකියාවක් පමණක් බවය.


නීතිවිරෝධි ගිනි අවි ප්‍රවාහනය කිරිමේ චෝදනාව යටතේ ශ්‍රී ලංකා නාවික හමුදාව විසින් 2015 ඔත්තෝබර් 15 වැනි දා  ඇවන්ගාඩ් නෞකාව අත් අඩංගුවට ගෙන වැඩිදුර පරික්ෂණ සඳහා අපරාධ පරික්ෂණ දෙපාර්තමේන්තුවට බාර දෙන ලදී.


ඒ අනුව කරන ලද පරික්ෂණවලදී නැවේ තිබී ටි56 ගිනි අවි 549ක් 84 එස් ගිනිඅවි 264ක් එල්.එම්.ජී.ගිනිඅවි 2ක්ද උණ්ඩ 204674ක් සොයාගෙන ඇත.


වැඩිදුර විභාගය දෙසැම්බර් 16 වැනි දාට කල් තබන ලදී.