(චන්ද්‍රසේන ගමගේ)
ඇමති මහින්ද අමරවීර හම්බන්තොට දිස්ත්‍රික්කය තුළ ඒකාධිපති ගමනක් යනවා. එතුමා පසු ගිය දා මහවැලි ඉඩම් ඔප්පු 3000ක් ජනතාවට ලබා දුන්නා.සජිත් ප්‍රේමදාස ඇමතිතුමාවත් මමත් මේ ගැන දන්නේ නෑ . ධීවර ඇමති වරයා හම්බන්තොට දිස්ත්‍රික්කයේ තනි ගමනක් යනවා. අපි නිකමුන් වගේ ඉන්නවා.ජනාධිපති තුමනි කරුණාකරල මේ ගමන නවත්වන්න කටයුතු කරන්න යැයි ධීවර හා ජලජ සම්පත් සංවර්ධන රාජ්‍ය අමාත්‍ය දිලිප් වෙද ආරච්චි මහතා අද (14) සවස අම්බලන්තොට පට්ටිය වරායේ පැවති ධීවර හමුවකදී පැවසීය.
එහිදී වැඩි දුරටත් අදහස් දැක් වූ දිලිප් වෙදආරච්චි ඇමතිවරයා,ජනාධිපති මෛත්‍රීපාල සිරිසේන මහතා ජයග්‍රහණය කරවීම සදහා එක්සත් ජාතික පක්ෂය පෙරමුණ ගත්තා. හම්බන්තොට දිස්ත්‍රික්කය තුළ මමත් සජිත් ප්‍රේමදාස ඇමතිතුමාත් ඒ සදහා පෙරමුණ ගත්තා.අපිව පරාජයට පත් කරන්න කටයුතු කරපු මහින්ද අමරවීර ඇමතිවරයා නිසා අපි අපහසුතාවයට පත් වෙලා තිබෙනවා. ජනාධිපති තුමා මේ තත්ත්වය නැති කරන්න කටයුතු කරයි කියා අපි බලා පොරොත්තු වෙනවා.
මම දිස්ත්‍රික්  සංවර්ධන කමිටුවේ සභාපති. නමුත් මමත් දන්නේ නැතිව අමරවීර ඇමතිවරයා ඉඩම් ඔප්පු දෙනවා. මෙම තත්ත්වය නැති කොට ඉදිරියේදී එන මැතිවරණවලට මුහුණ දිය යුතු බව මම ජනාධිපතිවරයා  මතක් කරනවා.