ජුඩ් සමන්ත සහ හිරාන් ප්‍රියංකර ජයසිංහ
 
වනාතවිල්ලුව - අරුවක්කාළු ප්‍රදේශයේ ඉදිවෙමින් පවතින කසල බැහැර කිරීමේ අංගනයට කඩා වැදී එහි දේපල වලට හානි සිදුකිරීමේ සිද්ධියට සම්බන්ධ බව කියන දෙදෙනෙකුව වනාතවිල්ලුව පොලීසිය විසින් අත්අඩංගුවට ගනු ලැබීය.


පොලීසිය විසින් අත්අඩංගුවට ගෙන ඇත්තේ වනාතවිල්ලුව ප්‍රාදේශීය සභාවේ පොදුජන පෙරමුණ මන්ත්‍රීවරයකුව සහ තවත් අයෙකි.


කොළඹ එකතු වන කැළි කසල බැහැර කිරීම සඳහා වනාතවිල්ලුව - අරුවක්කාළු ප්‍රදේශයේ කසල අංගනයක් මේ දිනවල ඉදි කරමින් සිටී.


මෙම කසල අංගනය ඉදිකළහොත් ප්‍රදේශයේ පරිසරයට විශාල හානියක් සිදුවන බව පවසමින් ප්‍රදේශවාසීන් පසුගිය 9 වැනි දා විරෝධතාවයක නිරතවුහ.


එම විරෝධතාවයේදී කසල අංගනයේ ඇති ගොඩනැගිල්ලකට පහර දී අලාභ හානි සිදු කරන ලදැයි අත්අඩංගුවට ගෙන ඇති සැකකරුවන්ට එරෙහිව චෝදනා එල්ල වී ඇත.


අත්අඩංගුවට ගෙන ඇති සැකකරුවන් දෙදෙනා පුත්තලම මහේස්ත්‍රාත් අධිකරණයට ඉදිරිපත් කිරීමට නියමිතය.