(උපාලි ආනන්ද)

 අනුරාධපුර ගුවන් හමුදා කඳවුරට ගුවනින් හා ගොඩබිමින් ප‍්‍රහාර එල්ල කර  කඳවුරු ගුවන් පථයේ නවතා තිබු ගුවන් යානා 16ක් විනාශකර රුපියල් කෝටි 400ක අනර්ථයක් සිදු කළැයි කියන සිද්ධිය සම්බන්ධයෙන් වරද පිළිගත් කොටි සංවිධානයේ හිටපු ප‍්‍රබල සාමාජිකයින් දෙදෙනෙකුට වසර 10  බැගින් වෙන් වෙන් වශයෙන් බරපතල වැඩ සහිත සිරදඩුවම් නියම කිරිමට උතුරුමැද පළාත්බද මහාධිකරණ විනිසුරු මහේෂ් වීරමන් මහතා නියෝග කළේය.  

එම සිරදඬුවම් කාලය වසර පහකින් ගෙවී යාමටද තවදුරටත් නියෝග කෙරිණි. 

අනුරාධපුර මහාධිකරණය හමුවේ අද (16) යළි කැඳවු අවස්ථාවේ දී මෙම තීන්දුව ප්‍රකාශයට පත් කෙරිණි.

කොටි සංවිධානයේ හිටපු ප‍්‍රබල සාමාජිකයින් දෙදෙනා ත‍්‍රස්ත විමර්ශන කොට්ඨාසයේ සහකාර පොලිස් අධිකාරිවරයකුට ලබාදී ඇති පාපොච්චාරණය නීත්‍යනුකූල බවට දීර්ඝ නඩු විභාගයකින් පසුව මහාධිකරණ විනිසුරු මහේෂෟ වීරමන් මහතා  මීට පෙර තීන්දු කළේය.

මෙම ත‍්‍රස්ත ප‍්‍රහාරයෙන් ආරක්ෂක අංශ සාමාජිකයින් 14 දෙනෙකු මිය ගොස් ප‍්‍රහාරයට පැමිණි එල්ටීටීඊ සංවිධානයේ මරාගෙන මැරෙන කළු කොටි සාමාජිකයෝ 21 දෙනෙකු ද ශ‍්‍රී ලංකා ගුවන් හමුදාවේ ප‍්‍රති ප‍්‍රහාර හමුවේ අනුරාධපුර ගුවන් හමුදා කඳවුරු ගුවන් පථයේදී මරණයට පත් වූහ.