(විනීතා එම්. ගමගේ)

අනතුරුවලට මුහුණ දුන් වාහන 80 කට ආසන්න ප්‍රමාණයක් මේ මොහොතේ දක්ෂිණ අධීවේගී මාර්ගයේ තැන තැන නවතා ඇතැයි අධිවේගී මාර්ග නඩත්තු හා කළමණාකරණ අධ්‍යක්ෂ එස් ඕපනායක මහතා පවසයි.

අධිවේගී මාර්ගවල ඇති වන අනතුරුවලට ප්‍රධාන වශයෙන් නිදිමත හා වෙහෙස ගතිය තිබියදී රිය පැදවීමත්, වාහන පරික්ෂා කර බැලීමකින් තොරව මාර්ගයට ඇතුළ් කිරීමත් හදිසියේ තිරිංග තද කිරීමත් යන හේතු බලපාන බව පෙනී යන බවත් ඔහු කියයි.

ඉකුත් 14 දා සවස අවුරුදු නැකැත් අවසන් වීමත් සමග කොළඹින් පිටවීමට උත්සාහ ගත් අවස්ථාවේ 40000 කට ආසන්න වාහන ප්‍රමාණයක් අධිවේගී මාර්ගයට ඇතුළත් කර තිබු බවත් එහි දී අනතුරු අටක් සිදුවී එයින් වාහන 24 කට හානි සිදුවූ බවත් ඕපනායක මහතා පවසයි.

වාහනයක් මාර්ගයට දැමීමට පෙර එහි ධාවන තත්ත්වය පිළිබඳ හොඳින්  පරික්ෂා කර බලා ධාවනය කරන්නැයි රියැදුරන්ගෙන් ඉල්ලා සිටින බවත් විශේෂයෙන් නිදිමත පවතින අවස්ථාවල රිය ධාවනය නොකරන ලෙසත් ඉල්ලා සිටින බව ද ඔහු සඳහන් කළේය.