(බිඟුන් මේනක ගමගේ )
 

අගුණකොලපැලැස්ස බන්ධනාගාරයේ  රැඳවියන් පිරිසකට එල්ල වූ ප්‍රහාරය සම්බන්ධයෙන් සොයාබැලීමට පත්කළ ත්‍රිපුද්ගල කමිටුවේ වාර්තාව අධිකරණ හා බන්ධනාගාර ප්‍රතිසංස්කරණ ඇමැතිනි තලතා අතුකෝරාල මහත්මියට බාර දී ඇතැයි අමාත්‍යංශයේ නිලධාරියෙක් ‘ලංකාදීප’ යට පැවැසීය.
 
 බන්ධනාගාර මාධ්‍ය ප්‍රකාශක හා බන්ධනාගාර කොමසාරිස් තුෂාර උපුල්දෙණිය මහතාගේ සභාපතිත්වයෙන් යුතු මෙම ත්‍රිපුද්ගල කමිටු වාර්තාව සතියක් වැනි කාලයක් ඇතුළත සකස් කළේ යැයි ද ඇමැතිවරිය මේ වනවිට එය නිරීක්ෂණයට ලක්කරමින් සිටින්නේ යැයි ද එම නිලධාරියා කීය.
 
 මේ අතර අගුණකොලපෑලැස්ස ප්‍රහාරය සම්බන්ධයෙන් සොයාබැලීමට අධිකරණ හා බන්ධනාගාර ප්‍රතිසංස්කරණ ඇමැතිනි තලතා අතුකෝරාල මහත්මිය පත්කළ දෙවැනි කමිටුවේ වාර්තාව ලබන 25 වැනිදා ලැබීමට නියමිත යැයි ද ඔහු පැවසීය.
 
 ඒ අනුව අදාළ වාර්තා දෙකම සසඳා බලා ඉදිරි ක්‍රියාමාර්ග ගනු ඇතැයි ද එම නිලධාරියා වැඩිදුරටත් සඳහන් කළේය.
 
 අගුණකොලපෑලැස්ස බන්ධානාගාරයේදී පසුගිය නොවැම්බර් 22 වැනිදා සිදු වී යැයි කියන මෙම ප්‍රහාරය සම්බන්ධයෙන් මුල්වරට මාධ්‍යට කරුණු අනාවරණය කෙරුණේ පසුගිය 16 වැනිදා සිරකරු අයිතිවාසිකම් සුරැකීමේ කමිටුව විසින් පවත්වන ලද මාධ්‍ය හමුවකදීය.
 
 බන්ධනාගාර පරිශ්‍රයෙහිදී පිරිසක් පොලු මුගුරුවලින් පහර දෙන දර්ශන ඇතුලත් පැය භාගයක පමණ කාලයක් පුරා ධාවනය වන සී.සී.ටී.වී දර්ශන අඩංගු සංයුක්ත තැටියක් මෙම මාධ්‍ය හමුවේදී ප්‍රදර්ශනය කෙරිණි.