(උපාලි ආනන්ද)

ඵප්පාවල සදරැස්ගම එකම පවුලේ සිව්දෙනකු අත් පොරවකින් කපා කොටා ඝාතනය කරනු ලැබීමේ සිද්ධිය සම්බන්ධයෙන් එම පවුලේ ඥාති පුත‍්‍රයකුට උතුරු මැද පළාත් බද මහාධිකරණ විනිසුරු මංජුල  තිලකරත්න මහතා අද (21) මරණ දඬුවම නියම කළේය.
 
මෙසේ මරණ  දඩුවම නියම වූයේ එකම පවුලේ පියාට, මවට ,දියණියට සහ පුතාට අත් පොරවකින් කොටා ඝාතනය කළැයි අධිචෝදනා ලබා සිටි එප්පාවල ඇදගල මිහිදුපුර පදිංචි විතානගමගේ දිනූක ලක්මාල් නැමැති 28 හැවිරිදි තරුණයකුටය

විත්තිකරුට මරණ දඩුවම නියම කරමින් මහාධිකරණ විනිසුරු තිලකරත්න මහතා පැවසුවේ විත්තිකරු මනුෂ්‍ය ඝාතන හතරක් සිදු කර ඇති බවට  ඔප්පු කළ හැකි ඇසින් දුටු සාක්සි කිසිවක් නොමැති  බවයි.එහෙත් විත්තිකරු මෙම  අපරාධය සිදු කළ බවට පරිවේෂණීය සාක්ෂි මගින් සාධාරණ සැකයෙන් ඔබ්බට ඔප්පු වී  ඇති බව විනිසුරුවරයා ප්‍රකාශ කළේය.

ඒ අනුව මනුෂ්‍ය ඝාතන හතරක් සිදු කළ බවට  විත්තිකරුට එරෙහිව නීතිපතිවරයා විසින් නගා ඇති අධි චෝදනා සියල්ලට විත්තිකරු වරදකරු බවට තමා නිගමනය  කරන බවද විනිසුරුවරයා පැවසීය.

අධි චෝදනා හතරට වෙන් වෙන්ව විත්තිකරුට මරණ දඩුවම් හතරක් නියම කෙරිණ.2010 වසරේ ජූලි මස 11 වන දින හෝ ඊට ආසන්න දිනයක මෙම අපරාධය සිදුව තිබුණි.